Delhi CM Oath Ceremony: وزیراعلیٰ کا حلف لینے کیلئے رام لیلا میدان پہنچیں ریکھا گپتا، زیڈپلس کی سیکورٹی کی گئی فراہم،مہمانوں میں سواتی مالیوال بھی شامل

دہلی میں آج بی جےپی کی حکومت بننے جارہی ہے ،کچھ ہی دیر بعد حلف برداری ہونے والی ہے اور اسی سلسلے میں اب ریکھا گپتا حلف برداری کی تقریب میں شرکت کے لیے رام لیلا میدان پہنچ گئی ہیں۔ ان کے علاوہ تمام بی جے پی ایم ایل اے بھی رام لیلا میدان پہنچ چکے ہیں۔ اس سے قبل میڈیا سے بات کرتے ہوئے انہوں نے کہا کہ مجھے ایک بڑی ذمہ داری سونپی گئی ہے، میں پی ایم مودی اور اعلیٰ قیادت کا شکریہ ادا کرتی ہوں کہ انہوں نے مجھ جیسی بیٹی پر بھروسہ ظاہر کیا جو ایک سادہ اور عام  گھرانے سے ہے۔

وہیں دوسری جانب دہلی کی نامزد وزیر اعلیٰ ریکھا گپتا کو زیڈ زمرہ کی سیکورٹی دی گئی ہے۔ وزارت داخلہ کے حکم پر دہلی پولیس نے زیڈ زمرہ کی سیکورٹی فراہم کی ہے۔ اس کے علاوہ ریکھا گپتا کے گھر کی سیکورٹی بھی بڑھا دی گئی ہے۔ دہلی کی وزیر اعلیٰ ریکھا گپتا کو حلف اٹھانے کے فوراً بعد زیڈ زمرہ کی سیکورٹی ملے گی۔ اس میں 2 پی ایس او چوبیس گھنٹے تعینات ہوں گے اور 1 اسکارٹ وہیکل جس میں سکیورٹی اہلکار تعینات ہوں گے۔ ریکھا گپتا کے گھر کے سامنے 4 پولیس اہلکار،پیچھے کی طرف 4 پولیس اہلکار اور 2 کمانڈوز ہوں گے۔

 وہیں رام لیلا میدان میں مہمانوں کی آمد کا سلسلہ جاری ہے۔ ایل جی ونئے سکسینہ بھی پہنچ چکے ہیں ۔ ان کے علاوہ کئی ریاستوں کے وزرائے اعلیٰ بھی رام لیلا میدان پہنچ چکے ہیں ، سب سے اہم بات یہ ہے کہ سواتی مالیوال بھی رام لیلا میں نظرآرہی ہیں ۔ سواتی مالیوال عام آدمی پارٹی کی باغی راجیہ سبھا رکن ہیں اور ان کا اس تقریب میں حاضر ہونا یہ بتارہا ہے کہ وہ بہت جلد بی جے پی میں شمولیت اختیار کرسکتی ہیں ۔

بھارت ایکسپریس۔