Defence exports: دفاعی برآمدات 2029-30 تک بڑھ کر 50,000 کروڑ روپے ہو جائیں گی: راج ناتھ سنگھ

نئی دہلی: مرکزی وزیر دفاع راج ناتھ سنگھ نے جمعہ کے روز مہاراشٹر کے چھترپتی سمبھاجی نگر میں مہارانا پرتاپ کے مجسمے کی نقاب کشائی کی اور انہیں خراج عقیدت پیش کیا۔ تقریب سے خطاب کرتے ہوئے سنگھ نے دفاعی شعبے میں ہندوستان کو آتمنربھر بنانے کے لیے موجودہ حکومت کے اقدامات پر روشنی ڈالی۔ انہوں نے کہا کہ ہندوستان سے دفاعی برآمدات اب 24,000 کروڑ روپے کی مالیت تک پہنچ گئی ہیں اور انہوں نے یقین ظاہر کیا کہ برآمدات 2029-30 تک بڑھ کر 50,000 کروڑ روپے تک پہنچ جائیں گی۔

سنگھ نے کہا، ’’ہم ہندوستان کو دفاعی پیداوار میں آتمنربھر بنانے کے لیے پوری طرح پرعزم ہیں۔ جب ہماری حکومت 2014 میں اقتدار میں آئی، ہندوستان سے دوسرے ممالک کو دفاعی برآمدات تقریباً 600 کروڑ روپے تھیں۔ آج، ہم نے اسے بڑھا کر تقریباً 24،000 کروڑ روپے کر دیا ہے۔ ہمارا ہدف ہے کہ اسے 2029-30 تک بڑھا کر 50،000 کروڑ روپے کر دیا جائے۔‘‘ انہوں نے کہا، ’’یہ صرف ایک ہدف نہیں ہے – ہم اسے حاصل کر لیں گے۔ یہ ہمارا پختہ یقین ہے۔ ہم نے دفاعی شعبے میں ہندوستان کو آتمنربھر بنانے کے لیے بہت سے اقدامات کیے ہیں۔ ‘‘

مہاراشٹر کے وزیر اعلیٰ دیویندر فڑنویس نے بھی اس موقع پر مہارانا پرتاپ کو خراج عقیدت پیش کیا۔ انہوں نے کہا، ’’جب میں نے سمردھی ہائی وے بنانے کا فیصلہ کیا، اس وقت میں ہمیشہ کہتا تھا کہ پونے مہاراشٹر کا صنعتی مقناطیس ہے، لیکن اب یہ صنعتی مقناطیس بدلنے والا ہے اور یہ صنعتی مقناطیس سمبھاجی نگر اور جالنا بننے والا ہے… جب بھی ہم صنعت کاروں کو سمبھاجی نگر لاتے ہیں، وہ یہاں آباد ہوتے ہیں اور یہاں سرمایہ کاری کرتے ہیں…‘‘

جمعرات کے روز وزیر دفاع سنگھ نے کہا کہ تجارتی پابندیوں، ٹیرف کی جنگ، غیر ملکی اجزاء اور لاجسٹک نیٹ ورکس پر ضرورت سے زیادہ انحصار اور ’وقت پر‘ نقطہ نظر کی خرابیاں واضح ہو گئی ہیں۔ مانیک شا سینٹر میں ایک تقریب سے خطاب کرتے ہوئے، انہوں نے زور دیا کہ حکومت کا مقصد مسلح افواج کو مستقبل کے لیے تیار کرنا ہے۔

سینئر دفاعی عہدیداروں اور پرائیویٹ دفاعی مینوفیکچرنگ کمپنیوں کے نمائندوں سے خطاب کرتے ہوئے مرکزی وزیر دفاع راج ناتھ سنگھ  نے کہا کہ کچھ سال پہلے تک دنیا بھر کی دفاعی کمپنیاں گلوبلائزڈ اور پیچیدہ سپلائی چینز پر منحصر تھیں جو کئی ممالک میں پھیلی ہوئی تھیں۔

بھارت ایکسپریس۔