JPC Meeting: جے پی سی میٹنگ میں داؤدی بوہرہ برادری نے خود کو وقف بورڈ کے دائرے سے باہر رکھنے کا کیا مطالبہ، جانئے تفصیلات

نئی دہلی: وقف ترمیمی بل پر حکمراں جماعت اور اپوزیشن ارکان پارلیمنٹ کے درمیان تنازعہ جاری ہے۔ اس دوران، منگل کو جے پی سی کی میٹنگ میں داؤدی بوہرہ برادری نے خود کو وقف بورڈ کے دائرہ کار سے باہر رکھنے کا مطالبہ کر دیا۔ منگل کے روز جے پی سی کی میٹنگ میں انجمن شریعت علی داؤدی بوہرہ برادری کی جانب سے سینئر وکیل ہریش سالوے نے داؤدی بوہرہ برادری کی انفرادیت کا حوالہ دیتے ہوئے     اس برادری کو وقف بورڈ کے دائرہ کار سے باہر رکھنے کا مطالبہ کیا۔

سالوے نے داؤدی بوہرہ برادری کی انفرادیت کو تسلیم کرنے والے سپریم کورٹ کے کئی فیصلوں کا حوالہ دیا اور کہا کہ وقف بورڈ کے اختیارات اس کمیونٹی کے بنیادی حقوق کو کمزور کرتے ہیں۔ سالوے اور دیگر نمائندوں نے داؤدی بوہرہ برادری کے مذہبی عقائد اور کمیونٹی لیڈر سے منسلک اختیارات کا حوالہ دیتے ہوئے جے پی سی کی میٹنگ میں پرزور طریقے سے یہ دلیل دی کہ وقف بورڈ کو اس کمیونٹی کی جائیدادوں اور معاملات میں مداخلت کی اجازت نہیں دی جا سکتی۔ اس لیے داؤدی بوہرہ برادری کی عبادت گاہوں کو وقف بورڈ کی جائیدادوں میں شامل نہیں کیا جانا چاہیے اور اس کے انتظام کا حق برادری کے پاس ہی رہنا چاہیے۔

انہوں نے یہ بھی کہا کہ وقف (ترمیمی) بل 2024 میں بھی داؤدی بوہرہ برادری کی انفرادیت کو مدنظر نہیں رکھا گیا ہے۔ منگل کے روز منعقدہ جے پی سی کی میٹنگ میں آل انڈیا ایڈوکیٹس کونسل، تفتیش کاروں اور طلبہ اور مدرسہ سیل کے نمائندوں کے علاوہ اے ایم یو علی گڑھ کے ایسوسی ایٹ پروفیسر ڈاکٹر محمد حنیف احمد نے بھی وقف ترمیمی بل پر اپنا موقف پیش کیا۔ ذرائع کے مطابق ان تنظیموں نے بھی کچھ تجاویز اور تبدیلی کے مطالبات کے ساتھ بل کی حمایت کی۔

 حالانکہ، وقف (ترمیمی) بل 2024 کو لے کر جے پی سی کی میٹنگ میں حکمراں پارٹی اور اپوزیشن کے اراکین پارلیمنٹ کے درمیان جاری تنازعہ منگل کے روز لوک سبھا اسپیکر اوم برلا تک پہنچا۔ کانگریس، ڈی ایم کے، ٹی ایم سی، اے اے پی اور ایس پی کے اپوزیشن ارکان پارلیمنٹ، جو جے پی سی کا حصہ ہیں، نے لوک سبھا اسپیکر اوم برلا سے ملاقات کی اور جے پی سی کی چیئرپرسن جگدمبیکا پال کے رویے کی شکایت کی۔

لوک سبھا اسپیکر کے ساتھ ملاقات کے دوران اپوزیشن اراکین پارلیمنٹ نے الزام لگایا کہ جے پی سی چیئرمین من مانی طریقے سے میٹنگیں بلا رہے ہیں اور جو لوگ اور تنظیمیں اس معاملے میں اسٹیک ہولڈر نہیں ہیں انہیں اپنے خیالات پیش کرنے کا موقع دیا جا رہا ہے۔ اپوزیشن ارکان کا یہ بھی الزام ہے کہ ایک طرف تو ایسے لوگوں اور تنظیموں کو مسلسل بولنے کا موقع دیا جا رہا ہے، جن کا وقف سے کوئی لینا دینا نہیں ہے، تو دوسری طرف اپوزیشن ارکان کو بولنے کا مناسب موقع بھی نہیں دیا جا رہا ہے۔

بھارت ایکسپریس۔