Sanae Takaichi expressed his gratitude: تاکائچی نے وزیراعظم مودی کا شکریہ ادا کیا، دلائی لامہ نے جاپان کی نئی وزیراعظم سنائی تاکائچی کو دی مبارکباد

نئی دہلی: دلائی لامہ نے جاپان کی نو منتخب وزیراعظم سنائی تاکائچی کو ان کی شاندار انتخابی کامیابی پر دلی مبارکباد پیش کی ہے۔ دلائی لامہ کے دفتر کی جانب سے جاری بیان میں کہا گیا کہ جاپانی عوام نے ایک باصلاحیت اور مضبوط قیادت پر اعتماد کیا ہے، جو عالمی سطح پر درپیش پیچیدہ چیلنجز کے تناظر میں نہایت اہم ہے۔ دلائی لامہ نے اپنے پیغام میں کہا: ’’یہ دیکھ کر خوشی ہوتی ہے کہ جاپان کے عوام نے آپ کی قابل قیادت پر اعتماد کا اظہار کیا ہے۔ ایسے وقت میں جب دنیا کو بے شمار پیچیدہ مسائل کا سامنا ہے، ہمدردی اور دوسروں کی فلاح و بہبود کے لیے سنجیدہ فکر پر مبنی قیادت انتہائی اہمیت رکھتی ہے۔ مجھے امید ہے کہ آپ کی کامیابی دنیا بھر کے رہنماؤں کے لیے تحریک کا باعث بنے گی اور ایک زیادہ انسانی، تعاون پر مبنی اور پُرامن عالمی برادری کے فروغ میں مدد دے گی۔‘‘ انہوں نے مزید کہا: ’’میں آپ کے لیے نیک تمناؤں کا اظہار کرتا ہوں کہ آپ اپنے فرائض منصبی بخوبی انجام دیں، جاپانی عوام کی امنگوں کو پورا کریں اور ایک زیادہ ہمدرد اور پُرامن دنیا کی تشکیل کے لیے کام کریں۔‘‘

وزیراعظم سنائی تاکائچی کا پی ایم مودی سے اظہار تشکر

جاپان کی وزیر اعظم سنائی تاکائچی نے پیر کے روز وزیراعظم نریندر مودی کی جانب سے مبارکباد کے پیغام پر شکریہ ادا کیا اور بھارت کے ساتھ خصوصی اسٹریٹجک اور عالمی شراکت داری کو مزید مضبوط بنانے کے عزم کا اظہار کیا۔ انہوں نے سوشل میڈیا پلیٹ فارم ایکس پر اپنے پیغام میں کہا: ’’وزیراعظم نریندر مودی، ایوان نمائندگان کے انتخابات میں ہماری کامیابی پر آپ کی پُرخلوص مبارکباد کا بے حد شکریہ۔ میں بھارت اور جاپان کے درمیان خصوصی اسٹریٹجک اور عالمی شراکت داری کو مزید مستحکم بنانے اور آزاد و کھلے ہند-بحرالکاہل (FOIP) کے قیام کے لیے آپ کے ساتھ قریبی تعاون کی منتظر ہوں۔‘‘ خاص بات یہ ہے کہ وزیراعظم تاکائچی نے اسی پیغام میں ہندی زبان میں بھی وزیراعظم مودی کا شکریہ ادا کیا، جو دونوں ممالک کے درمیان گرمجوش تعلقات کی علامت ہے۔

انتخابی کامیابی: ایل ڈی پی کو دو تہائی اکثریت

وزیراعظم تاکائچی کی قیادت میں لبرل ڈیموکریٹک پارٹی (LDP) نے جاپان کے ایوان زیریں (ہاؤس آف ریپریزنٹیٹوز) کے انتخابات میں زبردست کامیابی حاصل کرتے ہوئے 465 رکنی ایوان میں 310 نشستیں حاصل کرلیں، جو دو تہائی اکثریت بنتی ہے۔ یہ کامیابی پارٹی کو آئینی ترمیم اور قانون سازی کے اہم فیصلوں میں غیر معمولی طاقت فراہم کرتی ہے، چاہے ایوانِ بالا (ہاؤس آف کونسلرز) میں اسے مکمل اکثریت حاصل نہ ہو۔ یہ جاپان کی جنگ عظیم دوم کے بعد کی تاریخ میں پہلی بار ہوا ہے کہ کسی جماعت نے اتنی بڑی اکثریت حاصل کی ہو۔ وزیراعظم تاکائیچی نے واضح کیا کہ بھارت کے ساتھ شراکت داری آزاد، کھلے اور محفوظ ہند-بحرالکاہل خطے (FOIP) کے قیام میں کلیدی کردار ادا کرے گی۔ دونوں ممالک کے درمیان دفاع، تجارت، ٹیکنالوجی اور اسٹریٹجک تعاون کو مزید وسعت دینے پر زور دیا گیا ہے۔

بھارت ایکسپریس اردو۔