Curfew imposed in Manipur: ایک سال سے جل رہا ہے منی پور، تشدد میں پھر سے اضافے کی خبر،غیر معینہ مدت تک کیلئے کرفیو نافذ

منی پور میں تشدد میں اضافے اور ریاست کے مختلف حصوں میں پیر کو ہونے والے مظاہروں کے بعد منگل کو امپھال کے دونوں اضلاع میں غیر معینہ مدت کے لیے کرفیو نافذ کر دیا گیاہے۔امپھال ایسٹ اور امپھال ویسٹ دونوں کی ضلعی انتظامیہ نے “خراب ہوتے امن و امان کی صورتحال” کا حوالہ دیتے ہوئے منگل کی صبح 11 بجے سے کرفیو کے احکامات جاری کیے ہیں۔امپھال ویسٹ انتظامیہ نے ضروری خدمات اور میڈیا کو مستثنیٰ قرار دیتے ہوئے اگلے احکامات تک “کسی بھی شخص کی ان کی متعلقہ رہائش گاہوں سے باہر نقل و حرکت” پر پابندی لگا دی ہے۔چونکہ یکم ستمبر سے ریاست میں نسلی تشدد کے مختلف واقعات میں 11 افراد ہلاک ہوچکے ہیں، اس لئے طلباء نے وادی کے علاقوں بالخصوص تھوبل اور امپھال میں زبردست احتجاجی مظاہرے کیے۔

واضح رہے کہ منی پور پچھلے سال سے تشدد کی آگ میں جل رہا ہے۔ کوکی اور میتی برادریوں کے درمیان تشددکو شروع ہوئے ایک سال سے زیادہ کا عرصہ گزر چکا ہے لیکن حالات ابھی تک معمول پر نہیں آئے ہیں۔ امن کی بحالی کے دعوے ناکام ہو رہے ہیں۔ اب ایک 46 سالہ خاتون ضلع کانگ پوکپی میں دو مسلح گروپوں کے درمیان فائرنگ اور بم دھماکے میں پھنسنے کے بعد ہلاک ہو گئی ہے۔پولیس نے بتایا کہ یہ واقعہ اتوار کی رات دور افتادہ گاؤں تھنگبوہ میں پیش آیا۔ یہاں کے کچھ گھروں کو آگ لگائی  گئی جس کی وجہ سے مقامی لوگوں کو قریبی جنگلوں کی طرف بھاگنا پڑا۔ تاہم خاتون دونوں گروپوں کے درمیان تصادم میں پھنس گئی جس کے نتیجے میں اس کی موت واقع ہوگئی۔ متوفی خاتون کی شناخت نیمجاکھول لنگدیم کے نام سے ہوئی ہے۔

اہلکار نے بتایا کہ چورا چند پور ضلع اسپتال میں پوسٹ مارٹم کے بعد لاش لواحقین کے حوالے کر دی گئی۔ انہوں نے یہ بھی کہا کہ دونوں فریقوں کے درمیان لڑائی کے دوران بڑی تعداد میں طاقتور بم استعمال کیے گئے۔انہوں نے کہا کہ اس جھڑپ کے علاوہ رات کے وقت قریبی اسکول میں تعینات سی آر پی ایف اہلکاروں اور دہشت گردوں کے درمیان فائرنگ کی بھی خبریں موصول ہوئی ہیں۔ تاہم اس تصادم میں کسی جانی نقصان کی کوئی خبر نہیں ہے۔

بھارت ایکسپریس۔