PM Modi Elevates Bagurumba Dance To Global Fame: وزیر اعظم مودی کی کوششوں سے آسام کے باگورومبا رقص کو ملی عالمی پہچان، گوگل سرچ میں بنایا ریکارڈ

وزیر اعظم نریندر مودی کی مسلسل کوششوں اور ثقافتی ورثے کو عالمی سطح پر اجاگر کرنے کی حکمتِ عملی کے نتیجے میں آسام کا روایتی باگورومبا رقص اب عالمی پہچان حاصل کرنے کی جانب تیزی سے بڑھ رہا ہے۔ گزشتہ دو دہائیوں میں پہلی بار باگورومبا رقص سے متعلق عالمی سطح پر گوگل سرچ کا رجحان اپنی بلند ترین سطح پر پہنچ گیا ہے، جو اس لوک رقص کی بڑھتی ہوئی مقبولیت کی واضح علامت ہے۔ اہم بات یہ ہے کہ وزیر اعظم مودی کے سوشل میڈیا پلیٹ فارمز پر باگورومبا رقص سے متعلق ویڈیوز کو اب تک 200 ملین سے زائد ویوز حاصل ہو چکے ہیں۔ ماہرین کے مطابق یہ اعداد و شمار اس بات کی نشاندہی کرتے ہیں کہ آسام کی ثقافت اب عالمی ناظرین تک پہنچ رہی ہے اور بین الاقوامی سطح پر اس میں دلچسپی بڑھ رہی ہے۔

حال ہی میں اپنے آسام دورے کے دوران وزیر اعظم نریندر مودی نے گوہاٹی کے سروسجائی اسٹیڈیم میں منعقد ہونے والے باگورومبا ڈھوؤ ثقافتی پروگرام میں شرکت کی۔ اس موقع پر انہوں نے بوڈو برادری کی قدیم روایات، ثقافتی ورثے کو قریب سے دیکھا اور ان کی بھرپور ستائش کی۔ وزیر اعظم نے کہا کہ آسام کی ثقافت کو براہِ راست دیکھنا اور بوڈو سماج کی روایات کو سمجھنا ان کے لیے ایک یادگار تجربہ ہے۔ وزیر اعظم مودی نے اپنے خطاب میں کہا کہ وہ دیگر وزرائے اعظم کے مقابلے آسام کے سب سے زیادہ دورے کر چکے ہیں، کیونکہ ان کی ہمیشہ یہ خواہش رہی ہے کہ ریاست کی فن و ثقافت کو قومی اور عالمی سطح پر شناخت ملے۔ انہوں نے کہا کہ اسی مقصد کے تحت بیہو اتسو، جھوموئر بنندنی، نئی دہلی میں منعقد ہونے والا شاندار بوڈو مہوتسو اور دیگر ثقافتی پروگراموں کو بڑے پلیٹ فارم پر پیش کیا گیا۔

انہوں نے کہا کہ آسام کی ثقافت سے حاصل ہونے والا روحانی اور جمالیاتی سکون بے مثال ہے اور وہ ایسے مواقع کو کبھی ضائع نہیں کرتے۔ وزیر اعظم نے باگورومبا ڈھوؤ کو بوڈو شناخت کا زندہ مظہر قرار دیتے ہوئے کہا کہ یہ محض ایک تہوار نہیں بلکہ عظیم بوڈو روایت کو خراجِ تحسین پیش کرنے اور سماج کی ممتاز شخصیات کو یاد کرنے کا ذریعہ ہے۔ قابلِ ذکر ہے کہ باگورومبا رقص کو ’’تتلی رقص‘‘ بھی کہا جاتا ہے، جو آسام کے خوبصورت اور نمایاں لوک رقصوں میں شمار ہوتا ہے۔ یہ رقص فطرت سے ہم آہنگی، امن، زرخیزی اور خوشی کی علامت ہے اور بنیادی طور پر بوڈو نئے سال کے تہوار بویساگو سے وابستہ ہے۔ سیفُنگ بانسری، خام ڈھول اور سیرجا جیسے روایتی ساز اس رقص کی پہچان ہیں۔

آسام کے وزیر اعلیٰ ہمنت بسوا سرما کے مطابق، حالیہ پروگرام میں تقریباً 10 ہزار فنکاروں نے ایک ساتھ باگورومبا رقص پیش کیا۔ ثقافتی ماہرین کا کہنا ہے کہ ایسے بڑے پروگرام روایتی فنون کے تحفظ، فروغ اور نئی نسل تک منتقلی میں اہم کردار ادا کر رہے ہیں۔ وزیر اعظم مودی کی ذاتی شرکت اور مسلسل سرپرستی کے باعث باگورومبا ڈھوؤ اب صرف آسام یا بوڈو سماج تک محدود نہیں رہا، بلکہ یہ بھارت کی ثقافتی سافٹ پاور کی علامت بن کر دنیا بھر میں اپنی شناخت قائم کر رہا ہے۔

بھارت ایکسپریس اردو۔