Dr. Udit Raj: اروند کیجریوال پر کانگریس لیڈر کا بڑا حملہ—ہر معاملے میں خود ہی جج بننا چاہتے ہیں

نئی دہلی: کانگریس کے سینئر رہنما اور سابق رکن پارلیمنٹ ادت راج نے عام آدمی پارٹی کے سربراہ  اروند کیجریوال پر سخت تنقید کرتے ہوئے ان کے طرزِ عمل پر سوال اٹھائے ہیں۔ انہوں نے سوشل میڈیا پلیٹ فارم “ایکس” پر ایک پوسٹ کے ذریعے کیجریوال کو نشانہ بنایا اور کہا کہ وہ اکثر خود کو “خود ساختہ جج” کے طور پر پیش کرتے ہیں۔ اپنے بیان میں ادت راج نے کہا کہ ماضی میں اروند کیجریوال نے سابق وزیر اعلیٰ شیلا دکشت اور کانگریس کی سابق صدرسونیا گاندھی پر کامن ویلتھ گیمز، 2G اسپیکٹرم اور کوئلہ گھوٹالہ جیسے معاملات میں سنگین بدعنوانی کے الزامات لگائے تھے۔ اس وقت کیجریوال نے دعویٰ کیا تھا کہ وہ ان رہنماؤں کو جیل بھیجیں گے۔

کانگریس لیڈر نے مزید کہا کہ اب جب خود کیجریوال پر مختلف الزامات لگ رہے ہیں تو وہ اسی طرز پر خود ہی فیصلے کرنے کی کوشش کر رہے ہیں اور عدالتی نظام پر مکمل بھروسہ ظاہر نہیں کر رہے۔ انہوں نے طنزیہ انداز میں کہا کہ ایسا محسوس ہوتا ہے کہ کیجریوال ہر معاملے میں خود ہی جج بننا چاہتے ہیں۔

ادت راج نے اس رویے کو جمہوری نظام کے لیے نقصان دہ قرار دیتے ہوئے کہا کہ اگر کوئی رہنما خود ہی الزام عائد کرے اور خود ہی فیصلہ سنانے لگے تو پھر عدالتی عمل کی اہمیت کیا رہ جائے گی۔ انہوں نے بالواسطہ طور پر اس بات پر زور دیا کہ جمہوریت میں اداروں کا احترام اور قانونی عمل کی پاسداری ضروری ہے۔اس بیان کے بعد سیاسی ماحول ایک بار پھر گرم ہو گیا ہے۔ اگرچہ عام آدمی پارٹی  کی جانب سے اس پر ابھی تک کوئی سرکاری ردعمل سامنے نہیں آیا، تاہم اس معاملے پر سیاسی بحث تیز ہو گئی ہے اور مختلف حلقوں میں اس پر ردعمل دیکھنے کو مل رہا ہے۔

بھارت ایکسپریس اردو