Amit Shah News: مشکل حالات میں بھی بی ایس ایف جوان مسکراتے ہوئے سرحدوں کی حفاظت کرتے ہیں: امت شاہ

نئی دہلی: مرکزی وزیر داخلہ و تعاون امت شاہ نے جمعہ کے روز گجرات کے بھُج میں بھارت-پاکستان سرحد پر واقع جی-7 بارڈر آؤٹ پوسٹ پر جوانوں سے ملاقات کی اور جی-7 و جی-13 بارڈر آؤٹ پوسٹس کا افتتاح کیا۔ اس موقع پر گجرات کے وزیر اعلیٰ بھوپیندر پٹیل، نائب وزیر اعلیٰ ہرش سنگھوی، مرکزی داخلہ سکریٹری، انٹیلی جنس بیورو (آئی بی) کے ڈائریکٹر، سرحدی انتظام کے سکریٹری اور بی ایس ایف کے ڈائریکٹر جنرل سمیت کئی سینئر افسران موجود تھے۔

بی ایس ایف جوانوں کی قربانیوں کو سراہا

امت شاہ نے اپنے خطاب میں کہا کہ بی ایس ایف کے جوان انتہائی سخت موسمی اور جغرافیائی حالات میں خدمات انجام دیتے ہیں، لیکن ان کے چہروں پر ہمیشہ مسکراہٹ ہوتی ہے۔ انہوں نے کہا، ’’جب ہم ان جوانوں کو بھارت کی سرحدوں کی حفاظت کرتے ہوئے دیکھتے ہیں تو محسوس ہوتا ہے کہ ان کے مقابلے میں ہمارا کام بہت آسان ہے۔ جب بی ایس ایف کے جوان نہیں تھکتے تو ہمیں بھی تھکنے کا کوئی حق نہیں۔‘‘

بی ایس ایف نے 60 برس میں نبھائی اہم ذمہ داری

مرکزی وزیر داخلہ نے کہا کہ بی ایس ایف نے اپنی تشکیل سے لے کر گزشتہ 60 برسوں میں ملک کی دو انتہائی مشکل سرحدوں کی حفاظت کی ذمہ داری بخوبی نبھائی ہے۔ انہوں نے کہا کہ ان سرحدوں پر تعینات جوانوں کو منفی 45 ڈگری سے لے کر 45 ڈگری سے زائد درجہ حرارت تک ہر طرح کے حالات کا سامنا کرنا پڑتا ہے۔ امت شاہ نے کہا کہ کہیں کچھ کا دشوار گزار ریگستان ہے، کہیں سرکریک اور ہرامی نالہ کی دلدلی زمینیں ہیں، جبکہ کہیں راجستھان کے ریتیلے ٹیلوں کے درمیان جوانوں کو ڈیوٹی انجام دینی پڑتی ہے۔

کشمیر سے سندربن تک بی ایس ایف کی خدمات

انہوں نے کہا کہ کشمیر کی برفانی چوٹیوں سے لے کر سندربن کے جنگلات، گنگا ساگر کے ساحل، میگھالیہ اور آسام کے پہاڑی و جنگلاتی علاقوں تک بی ایس ایف نے گزشتہ چھ دہائیوں میں ملک کی ’’فرسٹ لائن آف ڈیفنس‘‘ کا کردار انتہائی مؤثر انداز میں ادا کیا ہے۔ امت شاہ نے کہا کہ اس دوران بی ایس ایف کے تقریباً دو ہزار جوانوں نے ملک کے لیے اپنی جان قربان کی ہے، اسی لیے 140 کروڑ بھارتی عوام اس فورس کے تئیں احترام کا جذبہ رکھتے ہیں۔

عوام کو بی ایس ایف کی قربانیوں سے روشناس کرانے کی کوشش

انہوں نے کہا کہ بناس کانٹھا میں ایک خصوصی مرکز قائم کیا گیا ہے تاکہ عام لوگ بی ایس ایف جوانوں کی مشکل ڈیوٹی کو قریب سے سمجھ سکیں۔ امت شاہ کے مطابق، گزشتہ ایک ماہ میں تقریباً ڈھائی لاکھ افراد اس مرکز کا دورہ کر چکے ہیں۔ انہوں نے بتایا کہ ابتدائی سروے میں کئی خواتین نے لکھا کہ اگر ان کے بچے بڑے ہو کر بی ایس ایف میں شامل ہوں تو انہیں فخر ہوگا۔

مرکزی وزیر داخلہ نے کہا کہ جب انہوں نے وزارت داخلہ کی ذمہ داری سنبھالی تو جائزے میں معلوم ہوا کہ ہرامی نالہ اور سرکریک کا علاقہ سکیورٹی کے لحاظ سے کمزور ہے۔ انہوں نے کہا کہ اس کے بعد واچ ٹاور، رابطہ سڑکیں، پینے کے پانی، طبی سہولیات، رہائش اور نئی باڑ بندی سمیت ’’لیک پروف سکیورٹی گرڈ‘‘ تیار کرنے پر کام شروع کیا گیا۔ امت شاہ نے دعویٰ کیا کہ اگلے دو برسوں میں یہ پورا علاقہ دشمن کی بری نظر سے ہمیشہ کے لیے محفوظ ہو جائے گا۔

اسمارٹ بارڈر سکیورٹی پروجیکٹ پر کام جاری

انہوں نے کہا کہ حکومت اسمارٹ بارڈر سکیورٹی پروجیکٹ کے تحت سرحدی سکیورٹی گرڈ کو مزید مضبوط بنا رہی ہے، جس میں ہزاروں کروڑ روپے کی سرمایہ کاری کی جا رہی ہے۔ امت شاہ نے کہا کہ ڈرون، ریڈار، واچ ٹاور، جدید ٹیکنالوجی اور جوانوں کی تعیناتی کے ذریعے ایسا مضبوط سکیورٹی نظام تیار کیا جا رہا ہے کہ مستقبل میں کوئی بھی بھارت کی سرحد میں دراندازی کی ہمت نہیں کر سکے گا۔

’چتوشکونیہ سکیورٹی گرڈ‘ کا نیا تصور

مرکزی وزیر داخلہ نے کہا کہ بی ایس ایف کے قیام کے 60ویں سال میں حکومت نے سرحدی سکیورٹی کے تصور کو مکمل طور پر بدلنے کا فیصلہ کیا ہے۔ انہوں نے کہا کہ مستقبل میں ’’چتوشکونیہ سکیورٹی گرڈ‘‘ تیار کیا جائے گا، جس میں عوام، سول انتظامیہ، مقامی پولیس، فوج اور بی ایس ایف جوان سبھی کی مشترکہ ذمہ داری ہوگی۔

بنگال میں باڑ بندی کا کام تیز ہوگا

امت شاہ نے کہا کہ سکیورٹی گرڈ کی سب سے بڑی کمزوری مغربی بنگال میں سرحدی باڑ بندی کا نامکمل ہونا تھا۔ انہوں نے دعویٰ کیا کہ اب ریاست میں ان کی پارٹی کی حکومت بننے کے بعد وزیر اعلیٰ نے سرحدی باڑ بندی کے لیے زمین فراہم کرنے کا اصولی فیصلہ کر لیا ہے اور کچھ زمین دی بھی جا چکی ہے۔ انہوں نے کہا کہ باڑ بندی مکمل ہوتے ہی دراندازی کو روکنے میں بڑی کامیابی حاصل ہوگی، جبکہ جنگلات اور ندی نالوں کے راستے ہونے والی دراندازی روکنے کے لیے تکنیکی باڑ بندی کا کام بھی تیزی سے جاری ہے۔ امت شاہ نے کہا کہ پورا ملک بی ایس ایف جوانوں کے جذبے، بہادری اور فرض شناسی کو سلام کرتا ہے۔ انہی جوانوں کی بدولت گجرات کے اس سرحدی علاقے میں آج امن قائم ہے۔

بھارت ایکسپریس۔