BJP attacks Sonia Gandhi’s book: سونیا گاندھی کی کتاب پر بی جے پی کا حملہ، پرینکا گاندھی بولیں ’مجھے خوشی ہے کہ وہ کتاب پڑھ رہے ہیں

نئی دہلی : کانگریس کی سابق صدر سونیا گاندھی کی کتاب ’بیلونگنگ: اے جرنی آف لو‘ میں کیے گئے انکشافات کو لے کر بی جے پی حملہ آور ہے۔ اس درمیان کیرالہ کے وائناڈ سے رکن پارلیمنٹ پرینکا گاندھی نے اپنی والدہ کا دفاع کرتے ہوئے کہا کہ انہیں بہت خوشی ہے کہ بی جے پی کے لوگ کتاب پڑھ رہے ہیں۔پرینکا گاندھی نے وائناڈ میں کہا کہ ہندوستان میں ان کی والدہ کی پوری زندگی کے دوران بی جے پی، آر ایس ایس اور کئی دیگر لوگوں نے ان کے بارے میں جو چاہا، وہ کہا۔ انہوں نے جھوٹ بولے، من گھڑت کہانیاں بنائیں اور بے بنیاد باتیں پھیلائیں، جبکہ ان کی والدہ ہمیشہ خاموش رہیں۔

بی جے پی پر پرینکا گاندھی کا نشانہ

کانگریس لیڈر نے کہا کہ اب ان کی والدہ اپنی کہانی بیان کر رہی ہیں اور انہیں ایسا کرنے کا پورا حق حاصل ہے۔ انہوں نے کہا کہ اچھی بات ہے کہ بی جے پی کے لوگ اسے پڑھ رہے ہیں۔ آخر ان سے اور کیا توقع کی جا سکتی ہے؟پرینکا گاندھی نے میڈیا سے گفتگو کرتے ہوئے کہا کہ اتنے طویل عرصے تک ان کی والدہ کے بارے میں جھوٹ بولا جاتا رہا ہے۔ اب جب وہ سچائی بیان کر رہی ہیں تو ظاہر ہے کہ بی جے پی کے لوگ اسی طرح کی باتیں کہیں گے۔ وہ اس کے علاوہ اور کیا کہہ سکتے ہیں؟

بی جے پی نے سونیا گاندھی کے دعوے پر اٹھائے سوال

دوسری جانب بدھ کو بی جے پی کے ترجمان سدھانشو ترویدی نے سونیا گاندھی کے اس دعوے کو مسترد کر دیا کہ ان کے شوہر راجیو گاندھی ایمرجنسی کے خلاف تھے۔وزیر اعظم کے عہدے سے متعلق تبصرہ کرتے ہوئے سدھانشو ترویدی نے کہا، ’’کیا زبردست قربانی تھی کہ وزیر اعظم کا عہدہ چھوڑ کر وہ ’سپر پی ایم‘ بن گئیں! متحدہ ترقی پسند اتحاد (یو پی اے) حکومت کے دوران قومی مشاورتی کونسل کی چیئرپرسن کی حیثیت سے کابینہ وزیر کا درجہ بھی قبول کر لیا۔‘‘

روی شنکر پرساد نے 1984 کے سکھ مخالف فسادات کا کیا ذکر

بی جے پی رہنما روی شنکر پرساد نے کہا کہ سونیا گاندھی نے اپنی یادداشتوں میں دعویٰ کیا ہے کہ بابری مسجد کی شہادت کی خبر ٹیلی ویژن پر دیکھ کر ان کی آنکھوں میں آنسو آ گئے تھے۔اس پر انہوں نے سوال کیا کہ جب دہلی میں ہزاروں سکھوں کا قتل عام ہوا تھا، تب سونیا گاندھی کی آنکھوں سے آنسو کیوں نہیں نکلے؟اس طرح سونیا گاندھی کی کتاب میں کیے گئے انکشافات کو لے کر کانگریس اور بی جے پی کے درمیان سیاسی بیان بازی تیز ہو گئی ہے۔