Tejashwi Yadav Arrives Bihar Assembly: آر جے ڈی لیڈر تیجسوی یادو وہیل چیئر سے اسمبلی پہنچے، پیر کے انگوٹھے میں لگی ہے چوٹ

پٹنہ: بہار اسمبلی کا بجٹ سیشن سوموار سے شروع ہو گیا ہے، جس میں حکومت اور حزب اختلاف کے درمیان اہم مسائل پر بحث متوقع ہے۔ سیشن کے پہلے دن ہی حزب اختلاف نے احتجاج کے ذریعے اپنے موقف کا اظہار کیا۔ اس دوران، راشٹریہ جنتا دل (آر جے ڈی) کے لیڈر اور حزب اختلاف کے لیڈر تیجسوی یادو اپنے پیر کے انگوٹھے میں چوٹ کے باوجود ویل چیئر سے اسمبلی پہنچے اور بجٹ سیشن میں حصہ لے کر اپنی ذمہ داری پوری کی۔

آر جے ڈی لیڈر تیجسوی یادو کے مطابق، انہیں گھر میں پیر کے انگوٹھے میں چوٹ آئی تھی، جس کے باعث ناخن کے قریب زخم ہو گیا۔ اس زخم کا بعد میں آپریشن بھی کیا گیا۔ چوٹ کے باوجود، تیجسوی یادو نے سیشن میں شرکت کی اور اسمبلی میں پہنچتے ہی ان کی تصاویر سوشل میڈیا پر وائرل ہو گئیں، جس کے بعد اسمبلی میں ہلچل دیکھنے میں آئی۔ سوشل میڈیا پر شائع ہونے والی ویڈیوز میں وہ کافی درد میں دکھائی دے رہے ہیں، تاہم وہ اپنے فرائض سے پیچھے نہیں ہٹے۔

راجد نے گزشتہ دن، یعنی اتوار کی شام، اپنے فیس بک پیج پر تیجسوی یادو کی چوٹ کے بارے میں اطلاع دی۔ پارٹی کی جانب سے لکھا گیا “اطلاع برائے عوام، 25 جنوری کو ٹھوکر لگنے سے لیڈر حزب اختلاف تیجسوی یادو کے پیر کے ناخن میں چوٹ آئی، جس کے بعد وہ طبی نگرانی میں صحت یابی حاصل کر رہے ہیں”۔

بجٹ سیشن میں کل یعنی تین فروری کو بہار کے فنانس منسٹر 2026-27 کا بجٹ پیش کریں گے۔ یہ سیشن 27 فروری تک جاری رہے گا اور اس دوران مجموعی طور پر 19 اجلاس ہوں گے۔ سیشن کے آغاز سے ہی حزب اختلاف نے مظاہروں کے ذریعے یہ واضح کر دیا ہے کہ اس سیشن میں بحث اور احتجاج نمایاں رہیں گے۔ پہلے دن ہی پٹنہ کے ہاسٹل میں رہنے والی ایک طالبہ کی وفات کے خلاف حزب اختلاف کے ارکان نے اسمبلی کے اندر احتجاج کیا۔ تیجسوی یادو کی اسمبلی میں شرکت اور حزب اختلاف کی احتجاجی حکمت عملی نے واضح کر دیا ہے کہ یہ بجٹ سیشن ہنگامہ خیز اور سیاسی کشیدگی سے بھرپور ہو گا۔

بھارت ایکسپریس اردو-