JDU Membership Exceeds 1 Crore: نتیش کمار کی پارٹی نے بنایا ریکارڈ، جے ڈی یو کے اراکین کی تعداد ایک کروڑ سے تجاوز

پٹنہ: بہار میں برسرِ اقتدار قومی جمہوری اتحاد (این ڈی اے) کی اہم اتحادی جماعت جنتا دل یونائیٹڈ (جے ڈی یو) نے اپنے بنیادی اراکین کی تعداد کے حوالے سے ایک نیا ریکارڈ قائم کرنے کا دعویٰ کیا ہے۔ پارٹی کے مطابق اس کے بنیادی اراکین کی تعداد ایک کروڑ سے زیادہ ہو چکی ہے۔ جے ڈی یو کے سربراہ اور بہار کے سابق وزیرِ اعلیٰ نتیش کمار وزیراعلیٰ کا عہدہ چھوڑنے کے بعد مسلسل تنظیمی امور پر توجہ مرکوز کیے ہوئے ہیں۔

سنجے کمار جھا کا اعلان

پارٹی کے قومی عاملہ کے صدر سنجے کمار جھا نے بدھ کے روز سوشل میڈیا کے ذریعے اس کامیابی کی اطلاع دیتے ہوئے کہا کہ ایک کروڑ سے زائد اراکین پر مشتمل جے ڈی یو خاندان میں آپ کا خیرمقدم ہے۔ انہوں نے سوشل میڈیا پلیٹ فارم ایکس پر لکھا، ’’ہمیں یہ بتاتے ہوئے خوشی ہو رہی ہے کہ جے ڈی یو کے قومی صدر نتیش کمار کی جانب سے 6 دسمبر 2025 کو شروع کیے گئے ’جے ڈی یو رکنیت مہم 2025 تا 2028‘ کے تحت ایک کروڑ بنیادی اراکین بنانے کا پہلا ہدف چھ ماہ سے بھی کم عرصے میں حاصل کر لیا گیا ہے۔‘‘

ایک کروڑ سے زائد اراکین

سنجے کمار جھا کے مطابق 2 جون 2026 تک پارٹی کے بنیادی اراکین کی مجموعی تعداد ایک کروڑ ایک ہزار نو سو پچیس تک پہنچ چکی تھی۔ جے ڈی یو لیڈر نے اس کامیابی پر ریاست کے عوام کا شکریہ ادا کیا اور بوتھ سطح تک جاری رکنیت مہم کو کامیاب بنانے میں سرگرم کردار ادا کرنے والے تمام کارکنان کو مبارکباد پیش کی۔ انہوں نے کہا کہ اپنے مقبول لیڈر نتیش کمار کی رہنمائی میں پارٹی بہار کے عوام کی خدمت اور ان کی توقعات پر پورا اترنے کے لیے پُرعزم اور پابندِ عہد ہے۔‘‘

رکنیت مہم کا مقصد

جے ڈی یو کی رکنیت مہم کا آغاز نتیش کمار کی قیادت میں کیا گیا تھا۔ اس مہم کا بنیادی مقصد بوتھ سطح تک تنظیم کو مضبوط بنانا اور نئے افراد کو پارٹی سے جوڑنا تھا۔ پارٹی کے مطابق اس مہم کو ریاست بھر میں توقعات سے بڑھ کر حمایت حاصل ہوئی اور کارکنوں نے گاؤں سے لے کر شہروں تک بھرپور سرگرمی کا مظاہرہ کیا۔

تنظیمی طاقت میں اضافے کا دعویٰ

پارٹی کا ماننا ہے کہ ایک کروڑ سے زائد بنیادی اراکین کا ہدف حاصل ہونا تنظیمی سطح پر اس کی مضبوطی اور عوامی رابطے کی مہم کی کامیابی کا ثبوت ہے، جو آئندہ سیاسی سرگرمیوں اور انتخابی تیاریوں میں اہم کردار ادا کرے گا۔

بھارت ایکسپریس۔