قومی

Azam Khan gates Bail PAN Card Case: اعظم خان اورعبداللہ اعظم کو الہ آباد ہائی کورٹ سے ملی ضمانت، سزا معطل

سماج وادی پارٹی (ایس پی) کے سینئررہنما اعظم خان اوران کے بیٹے عبداللہ اعظم خان کودوپین کارڈ معاملے میں الٰہ آباد ہائی کورٹ سے بڑی راحت ملی ہے۔ ہائی کورٹ نے دونوں کی ضمانت کی عرضی منظورکرتے ہوئے ان کی سزا معطل کردی ہے۔ تاہم عدالت نے قصوروارقراردیئے جانے کے فیصلے پرروک لگانے کی درخواست مسترد کردی۔ جسٹس سمیت گوپال کی یک رکنی بنچ نے اعظم خان اورعبداللہ اعظم کی جانب سے دائرفوجداری نظرثانی کی عرضیوں پریہ فیصلہ سنایا۔ دونوں نے ٹرائل کورٹ کے فیصلے کوچیلنج کرتے ہوئے قصوروارقراردیئے جانے کے فیصلے پرروک لگانے، سزا معطل کرنے اورعبوری ضمانت پررہائی کی درخواست کی تھی۔

346 دن سے جیل میں بند ہیں اعظم خان اورعبداللہ

دوپین کارڈ معاملے میں اعظم خان اورعبداللہ اعظم خان کو17 نومبر2025 کو7-7 سال قید کی سزا سنائی گئی تھی۔ سزا سنائے جانے کے بعد اسی دن دونوں کوحراست میں لے کررام پورضلع جیل بھیج دیا گیا تھا۔ دونوں تقریباً 11 ماہ 12 دن، یعنی 346 دن سے جیل میں بند ہیں۔ ٹرائل کورٹ کے فیصلے کے خلاف دونوں نے سیشن کورٹ میں عرضی دائرکی تھی، لیکن 20 اپریل 2026 کوان کی اپیل خارج کردی گئی اورسزا برقراررکھی گئی۔ اس کے بعد دونوں نے راحت کے لیے الٰہ آباد ہائی کورٹ کا رخ کیا۔

15 اکتوبرکوعدالت نے فیصلہ محفوظ رکھا تھا

دو پین کارڈ معاملے میں اعظم خان اورعبداللہ اعظم کی عرضیوں پرالٰہ آباد ہائی کورٹ میں 15 اکتوبر2026 کوسماعت مکمل ہوئی تھی۔ دونوں فریقوں کے دلائل سننے کے بعد عدالت نے اپنا فیصلہ محفوظ رکھ لیا تھا۔ اب عدالت نے ضمانت اورسزا معطل کرنے کی درخواست منظورکرلی ہے، لیکن قصوروارقراردیئے جانے کے فیصلے پرروک لگانے سے انکارکردیا ہے۔

کیا اعظم خان اورعبداللہ اعظم آسکیں گے جیل سے باہر؟

ہائی کورٹ سے ضمانت ملنے اورسزا معطل ہونے کے باوجود اعظم خان اورعبداللہ اعظم کی رہائی دیگرزیرالتوا مقدمات کی صورت حال پرمنحصرکرے گی۔ موصولہ اطلاعات کے مطابق، دونوں کے خلاف دودیگرمقدمات بھی زیر التوا ہیں۔ اگران مقدمات میں پولیس کی جانب سے بی وارنٹ حاصل نہیں کیا گیا ہے اوررہائی میں کوئی دوسری قانونی رکاوٹ نہیں ہے تودونوں جیل سے باہرآسکتے ہیں۔

کیا ہوتا ہے بی وارنٹ؟

بی وارنٹ (B-Warrant) عدالت کی جانب سے جاری کیا جانے والا تحریری حکم ہوتا ہے، جس کے ذریعہ پہلے سے کسی دوسرے مقدمے میں جیل میں بند ملزم کومتعلقہ مقدمے میں عدالت کے سامنے پیش کرنے کا انتظام کیا جاتا ہے۔ اس کا مقصد ملزم کی دوسرے مقدمے میں عدالتی پیشی کویقینی بنانا ہوتا ہے۔

کیا ہے دو پین کارڈ کا معاملہ؟

یہ معاملہ عبداللہ اعظم کے پاس دوپین کارڈ ہونے کے الزامات سے متعلق ہے۔ شکایت میں الزام لگایا گیا تھا کہ دونوں پین کارڈ پرتاریخ پیدائش الگ الگ درج تھی اورانتخابی نامزدگی سے متعلق دستاویزات میں دوسرے پین کارڈ کا استعمال کیا گیا تھا۔ اس معاملے میں نچلی عدالت نے اعظم خان اورعبداللہ اعظم کوقصوروارقراردیتے ہوئے 7-7 سال قید کی سزا سنائی تھی۔ دونوں نے اس فیصلے کوچیلنج کیا تھا، لیکن سیشن کورٹ سے راحت نہ ملنے کے بعد انہوں نے ہائی کورٹ سے رجوع کیا۔

بھارت ایکسپریس اردو-

Nisar Ahmad

Recent Posts

یوگی کے گڑھ گورکھپور میں اکھلیش یادو کابڑا سیاسی شو، 20 کلومیٹر روڈ شو میں امڑی بھیڑ، بی جے پی کے صفائے کا دعویٰ

سماجوادی پارٹی کے سربراہ اکھلیش یادو بدھ کے روز اپنے پی ڈی اے رتھ کے…

3 hours ago

Social Justice Summit: سشما سوراج بھون میں سجے گا سماجی انصاف کا عظیم الشان پلیٹ فارم، وزیر اعظم مودی اختتامی اجلاس سے کریں گے خطاب

19 نومبر کو نئی دہلی میں منعقدہ دو روزہ محکمہ جاتی کانفرنس کے اختتامی اجلاس…

4 hours ago

PM Modi Meets Prince William and Kate: وزیر اعظم نریندر مودی کی پرنس ولیم اور شہزادی کیٹ سے ملاقات، ’ارتھ شاٹ پرائز‘ کی کوششوں کو سراہا

وزیر اعظم نے ماحولیاتی مسائل کے حل کے لیے نئی اختراعات اور ہندوستانی صلاحیتوں کو…

4 hours ago

Ukraine Crisis: کیا یوکرین جنگ ختم ہوگی؟ الاسکا میں ناکام مذاکرات کے بعد کل ٹرمپ اور پوتن کی اہم ملاقات

چین میں ٹرمپ، شی جن پنگ اور ولادیمیر پوتن کی پہلی سہ فریقی ملاقات، یوکرین…

4 hours ago