Amit Shah Attends Mayapur ISKCON event: مایاپور اسکون پروگرام میں بطور عقیدت مند شریک ہوا: امت شاہ

کولکاتا، 18 فروری (اے آئی این ایس)۔ مرکزی وزیر داخلہ امت شاہ نے بدھ کے روز کہا کہ وہ مغربی بنگال کے ضلع نادیا کے مایاپور میں واقع انٹرنیشنل سوسائٹی فار کرشنا کانسینسیس (ISKCON) مندر میں منعقد مذہبی پروگرام میں اپنی سرکاری حیثیت سے نہیں بلکہ چیتنیا مہا پربھو کے ایک عقیدت مند کے طور پر شریک ہوئے۔

انیسویں صدی کے ویشنو احیاء پسند رہنما اور گاؤڑیہ مٹھ کے بانی بھکتی سدھانت سرسوتی کے 152ویں جینتی کے موقع پر اجتماع سے خطاب کرتے ہوئے امیت شاہ نے اپنے مختصر خطاب میں کسی بھی سیاسی تبصرے سے گریز کیا اور پروگرام کی روحانی اہمیت اور چیتنیا مہاپربھو کی بھکتی روایت پر زور دیا۔

اس موقع پر امیت شاہ نے کہا کہ انہوں نے تقریب میں شریک ہونے والے عقیدت مندوں کو وزیر اعظم نریندر مودی کی جانب سے نیک خواہشات بھی پہنچائیں اور بھکتی کے پیغام کو شیئر کیا۔

انہوں نے کہا، ’’میں نے آج صبح وزیر اعظم نریندر مودی سے بات کی اور انہیں بتایا کہ میں مایاپور میں بھکتی سدھانت سرسوتی کی 152ویں جینتی میں شرکت کے لیے جا رہا ہوں۔ انہوں نے آپ سب کو دل سے سلام پیش کیا اور ’ہرے کرشن‘ کا پیغام دیا۔ کچھ دیر قبل مجھے بھارت کے وزیر داخلہ کے طور پر مخاطب کیا گیا، لیکن میں یہاں اس حیثیت سے نہیں آیا ہوں۔ میں آج یہاں چیتنیا مہاپربھو کے ایک ادنیٰ عقیدت مند کے طور پر حاضر ہوا ہوں۔”

وزیر داخلہ شاہ نے کہا کہ شری چیتنیا مہاپربھو کی جانب سے شروع کیے گئے بھکتی آندولن کو بھکتی سدھانت سرسوتی نے مضبوط اور ادارہ جاتی شکل دی، جنہوں نے جدید دور میں ویشنو فلسفے کو فروغ دینے میں اہم کردار ادا کیا۔

انہوں نے مزید کہا، ’’اس بھکتی تحریک کو نہ صرف آگے بڑھایا گیا بلکہ اسے ایک جدید ذریعہ بھی بنایا گیا، جس کے ذریعے نوجوانوں کو دنیا کی بھلائی کے لیے کام کرنے کی ترغیب دی گئی۔”

انہوں نے کہا کہ شری چیتنیا مہاپربھو نے جہالت میں ڈوبے لوگوں کو روحانی راستہ دکھایا اور پورے بھارت سمیت بیرونِ ملک بھی بھکتی کا پیغام پھیلایا۔

امت شاہ نے کہا، ’’انسان کے اندر اچھائی اور برائی دونوں پہلو موجود ہوتے ہیں، لیکن جب کوئی شخص اپنی ذات کو مٹا کر بھگوان کرشن میں یکجا ہو جاتا ہے تو سب کچھ نیکی میں بدل جاتا ہے۔ اسی راستے پر چلتے ہوئے شری چیتنیا مہاپربھو نے کیرتن، رقص، بھکتی موسیقی اور گیتا کے پیغام کے ذریعے بھارت کے مشرقی اور شمال مشرقی حصوں میں لاکھوں لوگوں کی زندگیوں میں عقیدت کا چراغ روشن کیا۔”

بھارت ایکسپریس۔