Assembly Election 2023: اسمبلی الیکشن 2023 میں جیت کے بعد وزیر اعلیٰ سے متعلق بی جے پی کا بڑا فیصلہ، یہاں جانئے پورا معاملہ

Assembly Election 2023: مدھیہ پردیش، راجستھان اور چھتیس گڑھ میں الیکشن جیتنے کے بعد بی جے پی کے سامنے سب سے بڑا کام وزیراعلیٰ کی تقرری کرنا ہے۔ اسی غوروخوض کے درمیان بی جے پی قیادت نے بڑا فیصلہ لیا ہے۔ بتایا جا رہا ہے کہ مدھیہ پردیش، راجستھان اورچھتیس گڑھ میں غیررکن اسمبلی کو بھی وزیراعلیٰ بنایا جاسکتا ہے۔ اس سے مدھیہ پردیش کے موجودہ وزیراعلیٰ شیوراج سنگھ چوہان کے دوبارہ وزیراعلیٰ بننے پرتعطل برقرارہے۔ بتایا جا رہا ہے کہ چھتیس گڑھ، مدھیہ پردیش اورراجستھان میں بی جے پی نئے چہروں کو بھی موقع دے سکتی ہے۔

گزشتہ دنوں پانچ ریاستوں کے اسمبلی الیکشن میں جیت حاصل کرنے والے بھارتیہ جنتا پارٹی (بی جے پی) کے 12 اراکین پارلیمنٹ میں سے 10 اراکین نے بدھ کے روز پارلیمنٹ کی رکنیت سے استعفیٰ دے دیا ہے۔ استعفیٰ دینے والے 10 اراکین پارلیمنٹ میں مدھیہ پردیش سے مرکزی وزیرنریندرسنگھ تومر، پرہلاد سنگھ پٹیل، راکیش سنگھ، ادے پرتاپ اورریتی پاٹھک نے استعفیٰ دیا ہے جبکہ چھتیس گڑھ سے ارون ساؤ اورگومتی سائی نے استعفیٰ دیا ہے۔ اس کے علاوہ راجستھان سے راجیہ وردھن سنگھ راٹھور، دیا کماری اورکروڑی لال مینا شامل ہیں۔ حالانکہ اسمبلی الیکشن میں جیت حاصل کرنے والے دواراکین پارلیمنٹ مہنت بالک ناتھ اوررینوکا سنگھ نے ابھی تک استعفیٰ نہیں دیا ہے۔ ذرائع کے مطابق، مہنت بالک ناتھ اوررینوکا سنگھ بھی جلد ہی لوک سبھا کی رکنیت سے استعفیٰ دیں گے۔

یہ بھی پڑھیں:  Assembly Election Results 2023: اسمبلی الیکشن جیتنے والے بی جے پی کے سبھی اراکین پارلیمنٹ نے دیا استعفیٰ، وزیر اعظم مودی کے ساتھ ہوئی تھی میٹنگ

اسمبلی الیکشن میں بی جے پی نے کیا نیا تجربہ

واضح رہے کہ اس بار بی جے پی نے اسمبلی انتخابات میں بڑا تجربہ کیا اور یہ فیصلہ پارٹی کے حق میں آیا۔ تینوں ریاستوں کے اسمبلی الیکشن میں بی جے پی نے وزیراعلیٰ کا چہرہ ڈکلیئرنہیں کیا تھا۔ مدھیہ پردیش میں شیوراج سنگھ چوہان، راجستھان میں وسندھرا راجے سندھیا اورچھتیس گڑھ میں رمن سنگھ جیسے بڑے چہرے تھے۔ الیکشن نتائج میں سبھی کوحیران کرتے ہوئے بی جے پی نے تینوں ریاستوں میں بڑی جیت درج کی۔ مدھیہ پردیش میں بی جے پی کو163، چھتیس گڑھ میں بی جے پی کو 54 اورراجستھان میں بی جے پی کو 115 سیٹوں پرجیت حاصل ہوئی۔ اب سب کواس بات کا انتظارہے کہ ریاست میں وزیراعلیٰ کون ہوگا؟