Apple cultivation in the sands: راجستھان کی ریت میں سیب کی کاشت، سیکر کی بیٹی سنتوش دیوی کو راشٹرپتی بھون سے یوم جمہوریہ کا خصوصی اعزاز

راجستھان کے ضلع سیکر کے بیری گاؤں سے تعلق رکھنے والی خاتون کسان سنتوش دیوی کو یوم جمہوریہ کی تقریبات میں شرکت کے لیے راشٹرپتی بھون سے خصوصی دعوت نامہ موصول ہوا ہے۔ اس اعزاز کی خبر سامنے آتے ہی نہ صرف بیری گاؤں بلکہ اطراف کے دیہی علاقوں میں خوشی اور فخر کی لہر دوڑ گئی ہے۔

راشٹرپتی بھون سے خصوصی دعوت

یہ دعوت نامہ ڈاک کے ذریعے موصول ہوا، جس کے بعد پورے علاقے میں سنتوش دیوی کی کامیابی کے چرچے ہونے لگے۔ راشٹرپتی بھون میں منعقد ہونے والی یومِجمہوریہ کی خصوصی تقریب میں ملک بھر سے اُن شخصیات کو مدعو کیا جاتا ہے جنہوں نے اپنے اپنے شعبوں میں نمایاں اور قابل تقلید کارنامے انجام دیے ہوں۔

زراعت میں جدت اور محنت کی مثال

بیری گاؤں کی رہنے والی سنتوش دیوی نے زراعت کے میدان میں سخت محنت اور نت نئے تجربات کے ذریعے اپنی ایک الگ شناخت قائم کی ہے۔ خاص طور پر انار کی جدید کاشت میں ان کے تجربات نے انہیں نہ صرف ضلع بلکہ ریاستی سطح پر بھی شہرت دلائی۔ ان کا انتخاب خواتین کو بااختیار بنانے اور کسانوں کے وقار کی علامت کے طور پر دیکھا جا رہا ہے۔

گاؤں میں خوشی کا ماحول

سنتوش دیوی کی اس کامیابی پر گاؤں والوں اور اہل خانہ نے دل کھول کر مبارکباد پیش کی ہے۔ مقامی لوگوں کا کہنا ہے کہ یہ اعزاز پورے علاقے کے لیے باعث فخر ہے اور اس سے دیگر خواتین کسانوں کو بھی آگے بڑھنے اور کچھ نیا کرنے کی ترغیب ملے گی۔ آئی اے این ایس سے گفتگو کرتے ہوئے سنتوش دیوی نے بتایا کہ تین دن قبل انہیں راشٹرپتی بھون سے دعوت نامہ ملا، جس کے بعد سے وہ بے حد خوش اور پرجوش ہیں۔ ان کے مطابق یہ اعزاز 17 برس کی مسلسل محنت اور جدوجہد کا نتیجہ ہے۔ انہوں نے کہا کہ یہ کامیابی صرف ان کی نہیں بلکہ اُن تمام لوگوں کی ہے جنہوں نے ان کے سفر میں ان کا ساتھ دیا۔

راجستھان میں سیب کی کامیاب کاشت

سنتوش دیوی نے بتایا کہ انہوں نے انار، سیب اور امرود سمیت مختلف پھلوں کی بغیر کیمیکل کاشت کی ہے۔ ان کے کھیتوں میں پیدا ہونے والے انار کا وزن تقریباً 800 گرام اور سیب کا وزن 200 گرام تک ہوتا ہے۔ عام طور پر راجستھان میں سیب کی کاشت کو ناممکن سمجھا جاتا ہے، لیکن انہوں نے اس تصور کو غلط ثابت کر دیا۔ سنتوش دیوی کا کہنا ہے کہ خواتین کو صرف گھریلو ذمہ داریوں تک محدود نہیں رہنا چاہیے بلکہ باہر نکل کر خود کفیل بننا چاہیے۔ ان کی کوششوں سے ہزاروں خواتین باغبانی کے ذریعے آمدنی حاصل کر رہی ہیں۔ وہ ماحولیاتی تحفظ کے لیے بھی سرگرم ہیں اور ہر سال کسانوں کے تعاون سے تقریباً 80 ہزار پودے لگواتی ہیں۔

زراعت میں زہر کے استعمال پر تشویش

انہوں نے زراعت میں کیمیائی ادویات کے بڑھتے استعمال پر تشویش ظاہر کرتے ہوئے کہا کہ اس سے نہ صرف فصلیں بلکہ انسانوں کی صحت بھی متاثر ہو رہی ہے۔ انہوں نے اپنے بیٹے کو زرعی تعلیم دلائی ہے تاکہ وہ مستقبل میں جدید اور محفوظ زراعت کو آگے بڑھا سکے۔ سنتوش دیوی نے بتایا کہ ایک وقت ایسا بھی تھا جب ان کے شوہر کی آمدنی محض تین ہزار روپے تھی، لیکن آج وہ اسی زراعت کے ذریعے تقریباً چالیس ہزار روپے ماہانہ کما رہی ہیں۔ انہوں نے بتایا کہ سال 2016-17 میں انہیں وزیراعلیٰ کی جانب سے ایک لاکھ روپے کا انعام بھی دیا گیا تھا، جس کے بعد انہوں نے پیچھے مڑ کر نہیں دیکھا۔

بھارت ایکسپریس اردو۔