Anant Ambani praised PM Modi: ڈیجیٹل انڈیا کو آگے بڑھانے کے لیے اننت امبانی نے وزیراعظم مودی کی تعریف کی، وکست بھارت کے لیے عہدبستگی کا اظہار

ممبئی: اننت امبانی نے بدھ کے روز وزیراعظم نریندر مودی کے ’ڈیجیٹل انڈیا‘ وژن کی تعریف کرتے ہوئے کہا کہ اسی وژن نے جیو کے سفر کو ایک مقصد عطا کیا۔ انہوں نے ’وکست بھارت‘ کے خواب کو حقیقت میں بدلنے کے لیے ریلائنس گروپ کی جانب سے مستقبل میں بھی اہم کردار ادا کرنے کے عزم کا اظہار کیا۔ جیو پلیٹ فارمز کی لسٹنگ کے موقع پر اننت امبانی نے کہا کہ ریلائنس گروپ ’ڈیجیٹل انڈیا‘ کے وژن اور وزیر اعظم کی مسلسل رہنمائی و حمایت کے لیے ان کا شکر گزار ہے۔ انہوں نے کہا، ’’ہم وزیر اعظم نریندر مودی کے تئیں گہرے تشکر کا اظہار کرتے ہیں۔ ان کے ’ڈیجیٹل انڈیا‘ وژن نے ہی جیو کو اس کا مقصد عطا کیا اور ہمیں ان کی مسلسل رہنمائی اور حمایت حاصل ہوتی رہی ہے۔‘‘

’وکست بھارت‘ کی تعمیر میں اہم کردار ادا کرے گا ریلائنس

اننت امبانی نے وزیر اعظم مودی کے تئیں احترام کا اظہار کرتے ہوئے کہا کہ ان کا گروپ ’وکست بھارت‘ کے وژن کو حقیقت میں تبدیل کرنے کے لیے آئندہ بھی اہم کردار ادا کرتا رہے گا۔ ان کے اس بیان کو ریلائنس انڈسٹریز کے چیئرمین مکیش امبانی کے اس موقف کی تائید کے طور پر دیکھا جا رہا ہے، جس کا اظہار انہوں نے 2016 میں جیو کی خدمات شروع کرتے وقت کیا تھا۔ اس وقت مکیش امبانی نے جیو کی خدمات کو ’ڈیجیٹل انڈیا‘ مہم کے نام وقف کیا تھا۔ انہوں نے کمپنی کے اس مشن پر زور دیا تھا، جس کا مقصد ملک کے لاکھوں لوگوں کو کم قیمت پر ڈیجیٹل کنیکٹیویٹی فراہم کرنا ہے۔

جیو کی کامیابی کروڑوں ہندوستانیوں کے اعتماد کا نتیجہ

اننت امبانی نے جیو پلیٹ فارمز کی لسٹنگ کو اظہار تشکر کا موقع قرار دیتے ہوئے کہا کہ یہ کامیابی ان کروڑوں ہندوستانیوں کی ہے، جنہوں نے جیو کے آغاز سے ہی اس پر اعتماد کیا ہے۔ انہوں نے کہا کہ جیو کی تعمیر ہندوستان کے لوگوں نے کی ہے اور ان کی توقعات پر پورا اترنا ہی کمپنی کا بنیادی مقصد ہے۔ اس اہم موقع کا ذکر کرتے ہوئے اننت امبانی نے ایک روحانی مثال بھی پیش کی۔ انہوں نے کہا کہ اسٹاک ایکسچینج کی گھنٹی بجنے کی آواز انہیں مندر کی گھنٹی جیسی محسوس ہوئی۔ ان کے مطابق، کاروبار بھی ایک طرح کی عبادت ہے اور ہر عبادت کا اختتام ’پرساد‘ کے ساتھ ہوتا ہے، جسے سبھی کے ساتھ تقسیم کیا جاتا ہے۔ انہوں نے کہا، ’’آج جیو کو پورے ہندوستان کے ساتھ مشترک کیا جا رہا ہے۔‘‘

دھیرو بھائی امبانی کے خواب اور مکیش امبانی کی دوراندیشی کا ذکر

اننت امبانی نے ریلائنس کی وراثت کا ذکر کرتے ہوئے گروپ کے بانی دھیرو بھائی امبانی کے خوابوں اور اپنے والد مکیش امبانی کی دوراندیشی کو یاد کیا۔ انہوں نے کہا کہ مکیش امبانی نے ایسے ہندوستان کا خواب دیکھا تھا جو کسی بھی قسم کی حدود میں بندھا نہ ہو، جب کہ دھیرو بھائی امبانی نے یہ ثابت کیا کہ ایک عام ہندوستانی بھی غیر معمولی اہداف حاصل کر سکتا ہے۔  صارفین اور شیئر ہولڈرز سے خطاب کرتے ہوئے اننت امبانی نے کہا کہ جیو کی تعمیر ہندوستان کے لوگوں نے کی ہے اور ان کے اعتماد و توقعات پر پورا اترنا کمپنی کی اولین ترجیح ہے۔

بھارت ایکسپریس اردو۔