Amit Shah In Tamil Nadu: تمل ناڈو میں وزیر داخلہ امت شاہ کا سیاسی بگل، ڈی ایم کے کو ملک کی سب سے بدعنوان حکومت قرار دیا

مرکزی وزیر داخلہ امت شاہ نے اتوار کو تمل ناڈو کے پدوکوٹئی میں منعقدہ ’’تملگم تھلائی نمرا تملنن پاینم یاترا‘‘ کے اختتامی اجلاس سے خطاب کرتے ہوئے ریاست کی ڈی ایم کے حکومت پر شدید حملہ بولا۔ انہوں نے ڈی ایم کے کو ملک کی سب سے بدعنوان حکومت قرار دیتے ہوئے دعویٰ کیا کہ اپریل 2026 میں تمل ناڈو میں این ڈی اے کی حکومت بنے گی اور وزیر اعظم نریندر مودی کی قیادت میں ریاست ترقی کی نئی راہ پر گامزن ہوگی۔ امت شاہ نے اپنے خطاب میں کہا کہ وہ تمام پارٹی کارکنان اور عوام کو یقین دلاتے ہیں کہ 2026 کے اسمبلی انتخابات میں این ڈی اے واضح اکثریت کے ساتھ اقتدار میں آئے گا۔ انہوں نے کہا کہ آج اس عظیم الشان جلسے کے ذریعے وہ تمل ناڈو کے عوام سے اپیل کرتے ہیں کہ وہ مودی کی قیادت میں بھارت کی ترقیاتی سفر میں ریاست کو شامل کریں اور تبدیلی کے لیے ووٹ دیں۔

مرکزی وزیر داخلہ نے ڈی ایم کے حکومت کو ہر محاذ پر ناکام قرار دیتے ہوئے کہا کہ اگر ملک میں کہیں سب سے زیادہ بدعنوان حکومت ہے تو بدقسمتی سے وہ تمل ناڈو کی حکومت ہے۔ ان کے مطابق ڈی ایم کے نے نہ عوامی فلاح کے وعدے پورے کیے اور نہ ہی گڈ گورننس فراہم کی۔ انہوں نے الزام لگایا کہ ڈی ایم کے حکومت کا واحد مقصد اقتدار کو خاندان کے اندر محدود رکھنا ہے۔

امت شاہ نے وزیر اعلیٰ ایم کے اسٹالن اور ان کے بیٹے ادے ندھی اسٹالن پر خاندانی سیاست کو فروغ دینے کا الزام لگایا۔ انہوں نے کہا کہ پہلے کروناندھی، پھر اسٹالن اور اب ادے ندھی کو آگے لانے کی کوشش کی جا رہی ہے، مگر 2026 میں یہ خواب ٹوٹ جائے گا۔ ان کے مطابق اب تمل ناڈو میں خاندانی سیاست کے خاتمے کا وقت آ چکا ہے۔ انہوں نے کہا کہ آنے والے انتخابات میں بھارتیہ جنتا پارٹی، اے آئی اے ڈی ایم کے اور دیگر اتحادی جماعتیں مل کر کانگریس اور ڈی ایم کے کا مقابلہ کریں گی۔ امت شاہ نے اے آئی اے ڈی ایم کے اور بی جے پی کے اتحاد کو قدرتی اتحاد قرار دیتے ہوئے یاد دلایا کہ دونوں جماعتیں 1998، 2019 اور 2021 میں بھی ایک ساتھ انتخابات لڑ چکی ہیں۔

امت شاہ نے اس الزام کو بھی مسترد کیا کہ این ڈی اے تمل زبان کے خلاف ہے۔ انہوں نے کہا کہ وزیر اعظم مودی نے ہی پہلی بار آئی اے ایس اور آئی پی ایس کے امتحانات سنسکرت سے پہلے تمل زبان میں کرانے کی پہل کی۔ اس کے علاوہ بنارس ہندو یونیورسٹی میں تمل مطالعات کے لیے سبرامنیم بھارتی چیئر قائم کی گئی اور عظیم تمل تصنیف تروکُرل کا 13 زبانوں میں ترجمہ بھی مودی حکومت کے دور میں ہوا۔ ڈی ایم کے حکومت پر مزید حملہ کرتے ہوئے امت شاہ نے کہا کہ ریاست کو کچرے کا ڈھیر بنا دیا گیا ہے اور دیگر ریاستوں کا فضلہ تمل ناڈو کی ندیوں میں ڈالا جا رہا ہے۔ انہوں نے الزام لگایا کہ ڈی ایم کے حکومت ہندو دھرم اور مذہبی عقائد کی توہین کر رہی ہے، رام مندر کی تقریب کے دوران غیر اعلانیہ کرفیو لگایا گیا اور سناتن دھرم کے خلاف قابل اعتراض بیانات دیے گئے، جسے عوام کبھی معاف نہیں کریں گے۔

بھارت ایکسپریس اردو