Union Home Minister Amit Shah: امت شاہ نے گوا میں ویسٹرن زونل کونسل کے 28ویں اجلاس کی صدارت کی

نئی دہلی : مرکزی وزیر داخلہ امت شاہ نے پیر کو گوا کے ڈونا پاؤلا میں ویسٹرن زونل کونسل کے 28ویں اجلاس کی صدارت کی۔ اجلاس میں گوا، گجرات، مہاراشٹر اور مرکز کے زیر انتظام علاقوں دادرا و نگر حویلی اور دمن و دیو کے نمائندوں نے شرکت کی۔اس اجلاس کا انعقاد وزارت داخلہ کے تحت بین ریاستی کونسل سیکریٹریٹ کی جانب سے کیا جا رہا ہے، جبکہ گوا حکومت اس کی میزبانی کر رہی ہے۔

امت شاہ ویسٹرن زونل کونسل کے چیئرمین

وزارت داخلہ کے مطابق، امت شاہ ویسٹرن زونل کونسل کے چیئرمین ہیں، جبکہ گوا کے وزیر اعلیٰ پرمود ساونت اس کے نائب چیئرمین ہیں۔ رکن ریاستوں میں سے ہر سال باری باری کسی ایک ریاست کے وزیر اعلیٰ کو کونسل کے نائب چیئرمین کی ذمہ داری سونپی جاتی ہے۔زونل کونسل میں مغربی خطے کی ہر ریاست کے وزیر اعلیٰ اور ہر ریاست سے 2 سینئر وزرا بطور ارکان شامل ہوتے ہیں۔ بھارت سرکار اور ریاستی حکومتوں و مرکز کے زیر انتظام علاقوں کے سینئر افسران نے بھی کونسل کے اجلاس میں شرکت کی۔

’ٹیم بھارت‘ کے تصور میں زونل کونسل کا اہم کردار

وزیر اعظم نریندر مودی نے ’تعاونی وفاقیت‘ (Cooperative Federalism) کے اصول پر ملک کے لیے ’ٹیم بھارت‘ (TEAM BHARAT) کا تصور پیش کیا ہے اور زونل کونسلیں اس سمت میں اہم کردار ادا کر رہی ہیں۔وزیر اعظم مودی نے جامع ترقی کے حصول کے لیے تعاونی اور مسابقتی وفاقیت کی صلاحیت سے فائدہ اٹھانے کی ضرورت پر زور دیا ہے۔’مضبوط ریاستوں سے ہی مضبوط ملک بنتا ہے‘ کے جذبے کے تحت زونل کونسلیں ایسے معاملات پر بات چیت اور غور و خوض کے لیے ایک منظم نظام فراہم کرتی ہیں جو 2 یا اس سے زیادہ ریاستوں یا مرکز اور ریاستوں کو مشترکہ طور پر متاثر کرتے ہیں۔ اس عمل کے ذریعے یہ کونسلیں باہمی تعاون کو فروغ دینے کے لیے ایک پلیٹ فارم کے طور پر بھی کام کرتی ہیں۔

کونسل کا کردار مشاورتی نوعیت کا

زونل کونسل کا کردار بنیادی طور پر مشاورتی ہوتا ہے، تاہم گزشتہ چند برسوں کے دوران یہ کونسلیں مختلف شعبوں میں باہمی افہام و تفہیم اور تعاون کے بہتر تعلقات قائم کرنے میں اہم ذریعہ بن کر ابھری ہیں۔تمام ریاستی حکومتوں، مرکزی وزارتوں اور محکموں کے تعاون سے گزشتہ 12 برسوں، یعنی جون 2014 سے اب تک، مختلف زونل کونسلوں اور ان کی مستقل کمیٹیوں کے مجموعی طور پر 70 اجلاس منعقد کیے جا چکے ہیں۔

خواتین اور بچوں کے خلاف جرائم سمیت اہم امور پر بحث

کونسل قومی اہمیت کے وسیع تر معاملات پر بھی تبادلہ خیال کرتی ہے۔ ان میں خواتین اور بچوں کے خلاف عصمت دری کے معاملات کی تیزی سے تحقیقات اور جلد فیصلوں کے لیے فاسٹ ٹریک اسپیشل کورٹس (FTSC) کا نفاذ بھی شامل ہے۔اس کے علاوہ ایمرجنسی رسپانس سپورٹ سسٹم (ERSS-112) کے نفاذ، غذائی تحفظ کے معیارات سے متعلق مسائل، ہر گاؤں کے ایک مقررہ دائرے میں بینک کی فزیکل برانچز (Brick-and-Mortar Banking) کی سہولت فراہم کرنے جیسے معاملات بھی زیر بحث آتے ہیں۔کونسل غذائیت، تعلیم، صحت، بجلی کے شعبے میں بہتری، شہری منصوبہ بندی، تعاونی نظام کو مضبوط بنانے، سائبر جرائم اور ڈیجیٹل انفراسٹرکچر جیسے اہم امور پر بھی غور و خوض کرتی ہے۔

بھارت ایکسپریس اردو