Allahabad High Court: الہ آباد ہائی کورٹ نے عباس انصاری کی درخواست پر اترپردیش کی یوگی حکومت سے مانگا جواب، اگلی سماعت 11 جون کو

الہ آباد ہائی کورٹ نے ضلع مئو سے تعلق رکھنے والے مختار انصاری کے بیٹے عباس انصاری کی درخواست پر اترپردیش حکومت اور پولیس سے دو ہفتوں کے اندر جواب طلب کیا ہے۔ اس معاملے کی اگلی سماعت 11 جون 2025 کو ہوگی۔

عباس انصاری پر الزام ہے کہ انہوں نے 2022 میں مئو ضلع میں ایک ریلی کے دوران نفرت انگیز تقریر کی تھی۔ ان کی درخواست میں ایک مبینہ اشتعال انگیز تقریر کی آڈیو کلپ پر مبنی فارنزک رپورٹ کو چیلنج کیا گیا ہے۔

جسٹس سنجے کمار سنگھ کی سنگل بنچ نے اس کیس کی سماعت کرتے ہوئے فریق مخالف نمبر 2، انسپکٹر گنگا رام کو بھی نوٹس جاری کیا ہے اور انہیں بھی جواب داخل کرنے کی ہدایت دی ہے۔

عدالت نے اپنے حکم میں کہا: “سرکاری وکیل نے جواب داخل کرنے کے لیے دو ہفتے کا وقت مانگا ہے، جو منظور کیا جاتا ہے۔ فریق مخالف نمبر 2 کو نوٹس جاری کیا جائے جو جلد از جلد واپس طلب کیا جا سکے۔ یہ معاملہ 11 جون 2025 کو دوبارہ فہرست میں شامل کیا جائے۔ اس دوران اگر فریق مخالف نمبر 2 چاہے تو وہ بھی جواب داخل کر سکتا ہے۔”

یاد رہے کہ مارچ 2022 میں اسمبلی انتخابات کے دوران ایک انتخابی ریلی کے دوران عباس انصاری کے بھائی کی تقریر کا ایک ویڈیو سوشل میڈیا پر وائرل ہوا تھا، جس میں مبینہ طور پر انہوں نے انتخابی نتائج کے بعد سرکاری افسران کو سنگین نتائج کی دھمکی دی تھی۔

اس ویڈیو کے وائرل ہونے کے بعد مئو پولیس نے عباس انصاری اور ان کے بھائی کے خلاف آئی پی سی کی دفعات 171F (انتخابات پر ناجائز اثر ڈالنے کا جرم) اور 506 (فوجداری دھمکی) کے تحت مقدمہ درج کیا تھا۔

عباس انصاری کی جانب سے دائر کردہ درخواست میں فارنزک رپورٹ کو چیلنج کیا گیا ہے، جس میں مذکورہ اشتعال انگیز آڈیو کلپ کا تجزیہ کیا گیا تھا۔ عدالت نے تمام فریقین کو جواب داخل کرنے کا موقع دیتے ہوئے معاملے کی سماعت ملتوی کر دی ہے۔

بھارت ایکسپریس اردو۔