AIMPLB has made a big appeal to Indian Muslims: وقف ترمیمی قانون پراحتجاج ضروری، مگرامن وامان کے ساتھ قانون کے دائرے میں کریں، آل انڈیا مسلم پرسنل لا بورڈ کی ہندوستانی مسلمانوں سے بڑی اپیل

آل انڈیا مسلم پرسنل لا بورڈ نے اپنے بیان میں مزید کہا کہ وقف قانون میں مرکزی حکومت کے ذریعہ من مانی، متنازعہ، دستوری حقوق سے متصادم ، امتیازوتفریق اورفرقہ واریت پرمبنی ترمیمات نے فی الواقع مسلمانوں کے جذبات کو برانگیختہ کر دیا ہے، جس کا اظہار ملک کے مختلف علاقوں میں احتجاج و مظاہروں کی شکل میں ہو رہا ہے۔ ہم ذمہ داران بورڈ مسلمانوں بالخصوص ہماری نئی نسل کے ان جذبات کو قدر کی نگاہ سے دیکھتے ہیں مگر ان سے اپیل کرتے ہیں کہ وہ جوش کے ساتھ ہوش کا دامن نہ چھوڑیں۔ وہ بورڈ یا کسی ذمہ دار جماعت کے تحت ہی کوئی سرگرمی انجام دیں۔ اس بات سے پوری طرح چوکنا رہیں کہ شر پسند عناصر ان کی صفوں میں شامل ہو کر انتشار و بدامنی نہ پیدا کریں، ہر کس و ناکس اور اجنبی افراد کی کال پر لبیک نہ کہیں۔ جب تک کہ بورڈ یا کوئی معتبر دینی تنظیم کوئی کال نہ دے اس پر بالکل توجہ نہ دیں۔ جن ریاستوں اور شہروں کے حالات سازگار نہ ہوں وہاں کوئی ریلی اور جلوس نہ نکالیں ۔ مظاہروں وغیرہ میں اشتعال انگیز نعرے نہ لگائیں۔