Ajit Pawar’s last rites: غم میں ڈوبا مہاراشٹر، 29 جنوری کو سرکاری اعزاز کے ساتھ ادا کی جائیں گی اجیت پوار کی آخری رسومات

ممبئی: مہاراشٹر کے نائب وزیراعلیٰ اجیت پوار کی آخری رسومات 29 جنوری کو پورے سرکاری اعزاز کے ساتھ ادا کی جائیں گی۔ یہ اطلاع مہاراشٹر جنرل ایڈمنسٹریشن ڈپارٹمنٹ (پروٹوکول) نے بدھ کے روز دی۔

آج عوام کے لیے دیدار، کل صبح آخری رسومات

ودیا پرتشٹھان کے ٹرسٹی کرن کے مطابق اجیت پوار کا جسد خاکی آج ودیا پرتشٹھان گراؤنڈ میں عوام کے آخری دیدار کے لیے رکھا جائے گا، جب کہ آخری رسومات کل صبح 11 بجے انجام دی جائیں گی۔ کرن نے اے این آئی کو بتایا: ’’اجیت پوار کی آخری رسومات کل صبح 11 بجے ادا کی جائیں گی، آج عوام انہیں آخری خراج عقیدت پیش کر سکیں گے۔‘‘

طیارہ حادثے میں انتقال، انتخابی مہم کے لیے ہوئے تھے روانہ

نیشنلسٹ کانگریس پارٹی (این سی پی) کے سربراہ اور مہاراشٹر کے نائب وزیراعلیٰ اجیت پوار آج صبح ممبئی سے بارامتی جاتے ہوئے ایک چارٹرڈ طیارہ حادثے میں جاں بحق ہو گئے۔ وہ ضلع پنچایت انتخابات کی انتخابی مہم کے سلسلے میں بارامتی جا رہے تھے۔ حادثہ صبح تقریباً 8:48 بجے پیش آیا۔

ریاست میں سوگ، تین دن کا سرکاری ماتم

مہاراشٹر کے وزیراعلیٰ دیویندر فڑنویس نے اجیت پوار کے انتقال پر ریاست میں ایک دن کی سرکاری تعطیل اور تین دن کے سوگ کا اعلان کیا۔ اس دوران ریاست بھر میں سرکاری عمارتوں پر قومی پرچم سرنگوں رہے گا، کوئی سرکاری تفریحی پروگرام منعقد نہیں ہوگا اور بدھ، 28 جنوری 2026 کو تمام ریاستی سرکاری دفاتر بند رہیں گے۔ صحافیوں سے بات کرتے ہوئے وزیر اعلیٰ دیویندر فڑنویس نے کہا کہ اجیت پوار کے انتقال سے پورے مہاراشٹر میں غم کی لہر دوڑ گئی ہے۔ انہوں نے کہا: ’’اجیت دادا ایک محنتی اور مضبوط قیادت تھے، جو کسی بھی حالات میں متزلزل نہیں ہوئے۔ یہ مہاراشٹر کے لیے ایک مشکل دن ہے۔ ایسی قیادت برسوں میں تیار ہوتی ہے۔ ان کا انتقال ریاست کے لیے بڑا نقصان ہے اور میرے لیے ذاتی صدمہ بھی ہے، میں نے ایک دوست کھو دیا۔‘‘

حادثے کی جانچ شروع

طیارہ حادثے کی تحقیقات کے لیے ڈائریکٹوریٹ جنرل آف سول ایوی ایشن (DGCA) اور ایئرکرافٹ ایکسیڈنٹ انویسٹی گیشن بیورو کی ٹیموں کو جائے حادثہ پر روانہ کر دیا گیا ہے۔

طویل سیاسی سفر اور خدمات

اجیت پوار مہاراشٹر کے سب سے طویل عرصے تک غیر متواتر نائب وزیراعلیٰ رہنے والے رہنماؤں میں شامل تھے۔ وہ مختلف حکومتوں میں چھ مرتبہ نائب وزیراعلیٰ کے عہدے پر فائز رہے اور پرتھوی راج چوہان، دیویندر فڑنویس، اُدھو ٹھاکرے اور ایکناتھ شندے کی کابینہ میں خدمات انجام دیں۔ اجیت پوار اپنے پسماندگان میں اہلیہ سنیترا پوار اور دو بیٹے جے پوار اور پارتھ پوار کو چھوڑ گئے ہیں۔

بھارت ایکسپریس اردو۔