Air India Flight Suspension: سکیورٹی خدشات کے پیش نظر ایئر انڈیا کی سعودی عرب آنے اور جانے والی پروازیں 14 نومبر تک معطل

نئی دہلی: خطے میں بدلتی ہوئی سکیورٹی صورتِ حال کے پیش نظر ایئر انڈیا اور اس کی ذیلی کمپنی ایئر انڈیا ایکسپریس نے سعودی عرب کے اہم شہروں جدہ، ریاض اور دمام کے لیے آنے اور جانے والی تمام پروازیں 14 نومبر 2026 تک معطل کرنے کا اعلان کیا ہے۔ ایئر لائن نے جمعہ کو سوشل میڈیا پلیٹ فارم ایکس پر جاری ایک ایڈوائزری میں کہا کہ خطے کی موجودہ صورتِ حال کے باعث جدہ، ریاض اور دمام کے لیے ایئر انڈیا اور ایئر انڈیا ایکسپریس کی پروازیں 14 نومبر 2026 تک (اس دن سمیت) معطل رہیں گی۔

متاثرہ مسافروں کو مفت ری شیڈولنگ اور مکمل ریفنڈ کی سہولت

پروازوں کی معطلی سے متاثر ہونے والے مسافروں کے لیے ایئر لائن نے خصوصی رعایتوں کا اعلان بھی کیا ہے۔ ایئر لائن کے مطابق، ایسے مسافر جن کے پاس 30 اکتوبر 2026 یا اس سے پہلے جاری کیے گئے کنفرم ٹکٹ ہیں اور جن کا سفر 14 نومبر تک طے تھا، وہ دستیابی کی بنیاد پر ایک مرتبہ بغیر کسی اضافی فیس کے اپنی پرواز کی تاریخ تبدیل کراسکتے ہیں۔ یہ سہولت 29 نومبر 2026 تک کے سفر کے لیے دستیاب ہوگی۔ مسافر ٹکٹ منسوخ کراکے مکمل رقم کی واپسی کا متبادل بھی اختیار کرسکتے ہیں۔ ایئر انڈیا کے مسافر سعودی عرب میں ایئر انڈیا کے کسی بھی فعال اسٹیشن سے آنے یا جانے کے لیے دوبارہ بکنگ کراسکتے ہیں، جبکہ ایئر انڈیا ایکسپریس کے مسافروں کو سعودی عرب یا بحرین میں اس ایئر لائن کے فعال اسٹیشنوں سے سفر کی سہولت دی جائے گی۔ ایئر لائن نے یقین دہانی کرائی ہے کہ مسافروں کے سوالات، ٹکٹوں کی منسوخی اور تاریخوں میں تبدیلی کے لیے اس کی کسٹمر اسسٹنس ٹیمیں رابطہ مراکز اور مختلف شہروں کے بکنگ دفاتر کے ذریعے مدد فراہم کررہی ہیں۔ یہ تازہ ایڈوائزری اس اعلان کے صرف چھ دن بعد سامنے آئی ہے، جس میں ایئر لائن نے ریاض اور دمام کے لیے پروازیں 7 نومبر تک، جبکہ جدہ کے لیے پروازیں 31 اکتوبر تک معطل رکھنے کی بات کہی تھی۔ اب اس معطلی کو بڑھا کر تینوں شہروں کے لیے 14 نومبر تک کردیا گیا ہے۔

عمرہ زائرین کی مدد کے لیے جدہ میں بھارتی قونصل خانہ سرگرم

پروازوں کی منسوخی سے پیدا ہونے والی پریشانیوں کے پیش نظر جدہ میں ہندوستانی قونصل خانے نے بھی بھارتی شہریوں، بالخصوص متاثرہ عمرہ زائرین کے لیے تفصیلی ایڈوائزری جاری کی ہے۔ قونصل خانے کے مطابق، جدہ اور مکہ میں اس کے کنٹرول روم چوبیس گھنٹے کام کررہے ہیں۔ مقامی بھارتی کمیونٹی تنظیموں اور رضاکاروں کے تعاون سے متاثرہ افراد کو کھانا، ضروری ادویات اور فوری امداد فراہم کی جارہی ہے۔ قونصل خانہ بھارتی ایئر لائنز کے ساتھ مسلسل رابطے میں ہے تاکہ مسافروں کی رقم کی واپسی سے متعلق معاملات حل کیے جاسکیں۔ اس کے علاوہ بھارتی عمرہ ٹور آپریٹرز کو ان ایئر لائنز سے رابطہ کرایا جارہا ہے جو اب بھی بھارت کے لیے پروازیں چلارہی ہیں۔ تاہم متبادل سفری انتظامات کا انحصار نشستوں کی دستیابی، کرایوں اور متعلقہ ایئر لائنز کے ضوابط پر ہوگا۔ قونصل خانے نے متاثرہ مسافروں سے اپیل کی ہے کہ وہ دوبارہ بکنگ اور رقم کی واپسی کے لیے اپنی ایئر لائنز، ٹریول ایجنٹس اور عمرہ خدمات فراہم کرنے والوں سے مسلسل رابطے میں رہیں۔ قونصل خانے نے کہا ہے کہ وہ پھنسے ہوئے بھارتی شہریوں کی جلد واپسی کے لیے تمام متعلقہ فریقوں کے ساتھ مل کر کام کررہا ہے۔

حوثی باغیوں کے حملے کے دعوے کے بعد سکیورٹی خدشات

یہ پیش رفت ایسے وقت میں ہوئی ہے جب حوثی فوجی ترجمان یحییٰ سریع نے 23 اکتوبر کو دعویٰ کیا تھا کہ ان کے گروپ نے ریاض کے کنگ خالد ایئرپورٹ کے علاوہ سعودی عرب میں توانائی کے بنیادی ڈھانچے، ریفائنریوں اور کئی دیگر فضائی و فوجی تنصیبات کو نشانہ بنایا ہے۔ دوسری جانب سعودی قیادت والے اتحاد نے دعویٰ کیا تھا کہ اس نے حوثی ملیشیا کی جانب سے سعودی دارالحکومت ریاض کی طرف داغے گئے ایک بیلسٹک میزائل کو روک کر تباہ کردیا تھا۔

بھارت ایکسپریس اردو۔