Delhi Election 2025: دہلی انتخابات میں اے آئی ایم آئی ایم کو ملے گی کامیابی، اویسی کریں گے عآپ کے ساتھ اتحاد کا فیصلہ، وارث پٹھان کا بڑا بیان

نئی دہلی:  اے آئی ایم آئی ایم لیڈر وارث پٹھان نے بدھ کے روز آئی اے این ایس سے بات کرتے ہوئے دہلی اسمبلی انتخابات اور تروپتی مندر تنازعہ پر اپنے خیالات کا اظہار کیا۔ انہوں نے دہلی انتخابات میں اپنی پارٹی کی کامیابی کی امید ظاہر کی۔

وارث پٹھان نے کہا کہ دہلی اسمبلی انتخابات میں ہمارے امیدواروں کو عوام کی جانب سے زبردست حمایت حاصل ہوئی ہے۔ ہمیں امید ہے کہ جب 8 فروری کو انتخابی نتائج آئیں گے تو AIMIM کو دہلی میں کامیابی ملے گی۔ ایگزٹ پول پر تبصرہ کرتے ہوئے انہوں نے کہا کہ دہلی میں جو معلق اسمبلی نظر آرہی ہے، اس میں صرف اے آئی ایم آئی ایم ہی جیتے گی۔ عوام نے جو حمایت ہمیں دی ہے وہ ہماری جیت کی طرف اشارہ کر رہی ہے۔

وارث پٹھان سے جب پوچھا گیا کہ کیا ان کی پارٹی مستقبل میں کیجریوال کی پارٹی کے ساتھ اتحاد کرے گی تو انہوں نے کہا کہ یہ پارٹی صدر اسد الدین اویسی اور پارٹی قیادت کا فیصلہ ہوگا۔ ہم پارٹی کے فیصلے پر عمل کریں گے، ابھی ہم اپنی جنگ خود لڑ رہے ہیں۔

حال ہی میں تروپتی بالاجی مندر کی انتظامیہ کی جانب سے 18 غیر ہندو ملازمین کو دروازہ دکھانے کے بعد ایک تنازعہ کھڑا ہوگیا تھا۔ اس پر ردعمل ظاہر کرتے ہوئے وارث پٹھان نے کہا کہ اگر کوئی اور برادری ایسا قدم اٹھاتی ہے تو اسے غلط کہا جاتا ہے۔ اب غیر ہندو ملازمین کو تروپتی مندر سے باہر پھینکا جا رہا ہے، کیا یہ آئین کے خلاف نہیں ہے؟ آئین برابری کی بات کرتا ہے اور ہم ہمیشہ اس کے تحفظ کے لیے کھڑے رہیں گے۔

پٹھان نے وقف ایکٹ میں مرکز کی تجویز پر سوال اٹھایا جس میں کہا گیا ہے کہ وقف بورڈ میں دو غیر مسلم ارکان ہوں گے۔ انہوں نے اسے مساجد اور مدارس کی جائیدادوں پر قبضے کی کوشش قرار دیا اور بی جے پی کی نیتوں پر سوالیہ نشان لگایا۔ انہوں نے کہا کہ بی جے پی اور آر ایس ایس کے ارادے غلط ہیں، وہ ہماری مساجد اور مدارس پر قبضہ کرنے کی کوشش کر رہے ہیں۔ ہم اپنی جائیداد کسی کو لینے نہیں دیں گے۔ ہم بابری مسجد کو کھو چکے ہیں، اب ہمارے مذہبی اداروں کا ایک انچ بھی کسی کو نہیں ملے گا۔

بھارت ایکسپریس۔