Ahmedabad Factory Blast News: احمد آباد میں پٹاخہ فیکٹری میں خطرناک دھماکہ، 8 افراد ہلاک، 10 سے زیادہ مزدورجھلسے

احمدآباد کے رامول علاقے میں ہفتہ (18 جولائی) دوپہرایک پٹاخہ فیکٹری میں خطرناک دھماکہ نے بڑا حادثہ کھڑا کردیا۔ رامول-گتاراڈ روڈ پرٹیلنٹ اسکول کے سامنے محمودپورہ واقع ایک کھلی پٹاخہ فیکٹری میں اچانک زبردست دھماکہ ہوا۔ دھماکے کے فوراً بعد فیکٹری میں خطرناک آگ لگ گئی، جس نے دیکھتے ہی دیکھتے پورے کیمپس کواپنی چپیٹ میں لے لیا۔ حادثے میں اب تک 8 افراد کی موت ہوچکی ہے، جبکہ 10 سے زیادہ مزدورشدید طورپرزخمی ہوگئے ہیں۔

عینی شاہدین کے مطابق، دھماکہ اتنا زوردارتھا کہ اس کی آوازایک کلومیٹردورتک سنی گئی۔ دھماکے سے علاقے میں خوف وہراس پھیل گیا اورمقامی لوگ خوف کی وجہ سے گھروں اور دکانوں سے باہرنکل آئے۔ چند ہی منٹوں میں فیکٹری سے تیزشعلے اوردھوئیں کا ایک گہرا بادل اٹھ گیا۔

فائربریگیڈ اورایمبولینس نے سنبھالا مورچہ

حادثہ کی اطلاع ملتے ہی فائربریگیڈ کی کئی گاڑیاں موقع پرپہنچیں اورآگ بجھانے کی مہم شروع کی۔ ساتھ ہی 108 ایمبولینس کی مدد سے زخمیوں کو فوراً نزدیکی اسپتالوں میں داخل کرایا گیا۔ فائربریگیڈ ملازمین نے کافی مشقت کے بعد آگ پرقابوپانے کی کوشش شروع کی اورآس پاس کے علاقے کوبھی محفوظ کرایا۔ فائرمحکمہ کی ابتدائی جانکاری کے مطابق، آگ اوردھماکہ میں 8 افراد کی موت ہوئی ہے۔ حالانکہ کئی لوگ شدید طورپرجھلسے ہوئے ہیں، اس لئے مہلوکین کی تعداد میں اضافے کا بھی خدشہ ظاہرکیا جا رہا ہے۔ راحت اوربچاو کا کام مسلسل جاری ہے اور فیکٹری کے اندر پھنسے لوگوں کی تلاش کی جا رہی ہے۔

حادثے کی وجہ کی جانچ شروع

فی الحال دھماکہ کس وجہ سے ہوا، اس کا پتہ نہیں چل پایا ہے۔ پولیس، فائربریگیڈ اور دیگر متعلقہ ایجنسیاں موقع پرپہنچ کرجانچ میں مصروف ہوگئی ہیں۔ ابتدائی طورپر مانا جا رہا ہے کہ پٹاخہ بنانے کے دوران لاپرواہی یا دھماکہ اشیا میں اچانک ہوئے ردعمل کی وجہ سے یہ حادثہ ہوسکتا ہے۔ افسران کا کہنا ہے کہ جانچ پوری ہونے کے بعد ہی حادثے کی اصلی وجہ سامنے آئے گی۔

بھارت ایکسپریس اردو-