Adani Power: اڈانی پاور تمل ناڈو کے صارفین کو 558 میگاواٹ معیاری بجلی کرے گی سپلائی

ملک کی سب سے بڑی نجی بجلی پیدا کرنے والی کمپنی اڈانی پاور نے اعلان کیا ہے کہ اس کی ذیلی کمپنی موکسی پاور جنریشن لمیٹڈ کو تمل ناڈو میں 558 میگاواٹ بجلی کی فراہمی کے لیے پانچ سالہ معاہدہ حاصل ہوا ہے۔ یہ معاہدہ تمل ناڈو پاور ڈسٹری بیوشن کارپوریشن لمیٹڈ کی جانب سے لیٹر آف ایوارڈ جاری ہونے کے بعد طے پایا ہے۔ کمپنی کے مطابق اس معاہدے کے تحت ریاست کے صارفین کو اضافی، قابلِ اعتماد اور اعلیٰ معیار کی بجلی فراہم کی جائے گی، جس سے پاور گرڈ کا استحکام مضبوط ہوگا اور گھریلو صارفین، چھوٹے کاروباروں اور صنعتی اداروں کو بلا تعطل بجلی دستیاب ہو سکے گی۔ بجلی کی فراہمی یکم اپریل 2026 سے شروع ہونے کی توقع ہے۔

موکسی پاور تمل ناڈو کے شہر توتیکورن میں 1,200 میگاواٹ صلاحیت کے حامل تھرمل پاور پلانٹ کو چلا رہی ہے، جس میں دو یونٹس شامل ہیں اور ہر یونٹ کی پیداواری صلاحیت 600 میگاواٹ ہے۔ حالیہ معاہدے کے بعد پلانٹ کی دونوں یونٹس بجلی خریداری معاہدوں کے تحت آ چکی ہیں، جس سے کمپنی کی آپریشنل صلاحیت مزید مستحکم ہوئی ہے۔

اڈانی پاور نے سخت مسابقتی بولی کے عمل میں 5.910 روپے فی یونٹ کی سب سے کم شرح پیش کرتے ہوئے یہ ٹھیکہ حاصل کیا۔ کمپنی کا کہنا ہے کہ اس طویل مدتی معاہدے سے آمدنی میں استحکام آئے گا اور قلیل مدتی بجلی مارکیٹ میں اتار چڑھاؤ کے خطرات کم ہوں گے۔ کمپنی آئندہ برسوں میں اپنے تمام فعال اور زیر تعمیر منصوبوں کے لیے تقریباً سو فیصد پاور پرچیز ایگریمنٹ حاصل کرنے کا ہدف رکھتی ہے۔

اس وقت اڈانی پاور کی مجموعی پیداواری صلاحیت تقریباً 18.15 گیگاواٹ ہے، جو اسے بھارت کی سب سے بڑی نجی تھرمل پاور پیدا کرنے والی کمپنی بناتی ہے۔ کمپنی کے بجلی گھروں کا نیٹ ورک گجرات، مہاراشٹر، کرناٹک، راجستھان، چھتیس گڑھ، مدھیہ پردیش، جھارکھنڈ اور تمل ناڈو سمیت مختلف ریاستوں میں پھیلا ہوا ہے۔ اس کے علاوہ گجرات میں 40 میگاواٹ صلاحیت کا شمسی توانائی پلانٹ بھی فعال ہے۔ کمپنی کی مالی کارکردگی بھی مستحکم رہی ہے۔ مالی سال 2025-26 کی تیسری سہ ماہی میں اڈانی پاور کے قبل از ٹیکس منافع میں 5.3 فیصد اضافہ ریکارڈ کیا گیا، جو بڑھ کر 2,800 کروڑ روپے تک پہنچ گیا۔ ماہرین کے مطابق کم مالی لاگت اور بہتر آپریشنل کارکردگی اس اضافے کی بنیادی وجوہات ہیں، جبکہ صارفین کو مستقبل میں سستی اور قابلِ اعتماد توانائی کی فراہمی کا فائدہ ملنے کی امید ہے۔

بھارت ایکسپریس اردو۔