Gautam Adani Expresses Grief Over Passing Of Ajit Pawar: گوتم اڈانی نے اجیت پوار کے انتقال پر گہرے دکھ اور افسوس کا کیا اظہار

اڈانی گروپ کے چیئرمین گوتَم اڈانی نے بدھ کے روز مہاراشٹر کے نائب وزیر اعلیٰ اجیت پوار کے اچانک انتقال پر گہرے دکھ اور افسوس کا اظہار کیا ہے۔ مہاراشٹر کی سیاست میں ’دادا‘ کے نام سے مشہور اجیت پوار کا بدھ کی صبح بارامتی میں ایک المناک طیارہ حادثے میں انتقال ہو گیا، جس سے نہ صرف پوار خاندان بلکہ ریاست کی سیاسی دنیا میں سوگ کی لہر دوڑ گئی ہے۔ سوشل میڈیا پلیٹ فارم ایکس پر اپنے تعزیتی پیغام میں گوتَم اڈانی نے اجیت پوار کے ساتھ اپنی حالیہ ملاقات کو یاد کرتے ہوئے ان کی ترقی پسند سوچ اور ریاست و ملک کی تعمیر کے تئیں ان کی مضبوط وابستگی کو خراجِ عقیدت پیش کیا۔ اڈانی نے بتایا کہ صرف ایک ماہ قبل ہی وہ بارامتی میں اجیت پوار سے ملے تھے، جہاں دونوں شرد پوار سینٹر آف ایکسی لینس اِن آرٹیفیشل انٹیلی جنس کے افتتاح کے موقع پر ایک ساتھ موجود تھے۔

گوتَم اڈانی نے لکھا، ”مہاراشٹر کے نائب وزیر اعلیٰ اجیت پوار کے انتقال سے میں بے حد غمزدہ ہوں۔ ایک ماہ پہلے ہی ہم بارامتی میں شرد پوار سینٹر آف ایکسی لینس اِن اے آئی کے افتتاح کے موقع پر ساتھ کھڑے تھے۔ وہ لمحہ اجیت جی کی دور اندیشی، ترقی پر یقین اور بھارت کے نوجوانوں اور ان کے مستقبل کے لیے ان کی گہری وابستگی کی عکاسی کرتا تھا“۔ انہوں نے مزید کہا، ”آئیے ہم ان کے دکھائے ہوئے راستے پر چلتے ہوئے ایک ایسے مہاراشٹر کی تعمیر کے لیے کام جاری رکھیں جو مستقبل کے تقاضوں کے لیے پوری طرح تیار ہو۔ ان کی روح کو سکون ملے“۔

اجیت پوار بدھ کی صبح تقریباً 8 بج کر 45 منٹ پر بارامتی ایئرپورٹ پر لینڈنگ کے دوران پیش آنے والے طیارہ حادثے میں جاں بحق ہو گئے۔ حادثے کا شکار ہونے والا چارٹرڈ طیارہ لینڈنگ کے وقت توازن کھو بیٹھا اور زمین سے ٹکراتے ہی آگ کی لپیٹ میں آ گیا۔ اس افسوسناک حادثے میں اجیت پوار کے علاوہ ان کے سکیورٹی اہلکار، دو پائلٹس اور ایک خاتون کریو ممبر سمیت مجموعی طور پر پانچ افراد کی جان چلی گئی۔ شہری ہوا بازی کے ڈائریکٹوریٹ جنرل (ڈی جی سی اے) نے ان اموات کی سرکاری طور پر تصدیق کی ہے۔ ذرائع کے مطابق اجیت پوار ضلع پریشد اور پنچایت سمیتی انتخابات کے سلسلے میں ممبئی سے بارامتی ایک عوامی جلسے میں شرکت کے لیے جا رہے تھے، اسی دوران یہ حادثہ پیش آیا۔ حادثے کے بعد منظر انتہائی دل دہلا دینے والا تھا، جہاں جلتا ہوا طیارہ، بکھرا ہوا ملبہ، دھواں اور زخمیوں کو اسپتال لے جاتی ایمبولینسیں نظر آئیں۔ مقامی افراد نے بھی فوری طور پر امدادی کاموں میں ہاتھ بٹایا۔

حادثے کی اطلاع ملتے ہی بارامتی میں ہنگامی خدمات، فائر بریگیڈ اور اعلیٰ سکیورٹی افسران موقع پر پہنچ گئے اور ریسکیو آپریشن شروع کیا گیا۔ طیارے کے کنٹرول سے باہر ہونے کے اسباب کی جانچ کے لیے تحقیقات کا آغاز کر دیا گیا ہے۔ وزیر اعظم نریندر مودی نے بھی اجیت پوار کے انتقال پر گہرے رنج و غم کا اظہار کیا۔ انہوں نے اجیت پوار کو عوامی مسائل سے جڑا ہوا مضبوط لیڈر قرار دیتے ہوئے کہا کہ انتظامی امور پر ان کی گرفت اور کمزور طبقات کو بااختیار بنانے کا جذبہ قابلِ ستائش تھا۔ صدر جمہوریہ دروپدی مرمو نے بھی اس سانحے کو ملک اور مہاراشٹر کے لیے ناقابلِ تلافی نقصان قرار دیا اور کہا کہ خاص طور پر تعاون کے شعبے میں ان کی خدمات کو ہمیشہ یاد رکھا جائے گا۔

بھارت ایکسپریس اردو۔