Maharashtra Rain Alert: ممبئی میں بارش سے 7 لوگوں کی موت، تھانے-پالگھر میں ریڈ الرٹ! اسکول اور کالجوں میں چھٹیوں کا اعلان

ممبئی: مہاراشٹر کے کئی اضلاع میں مسلسل موسلادھار بارش نے نظام زندگی درہم برہم کر دیا ہے۔ ممبئی، ٹھانے، پالگھر اور نوی ممبئی کے کئی علاقوں میں سڑکوں پر پانی جمع ہونے کی وجہ سے صورتحال خراب ہے۔ آئی ایم ڈی نے ٹھانے اور پالگھر اضلاع میں 18-19 اگست کے لیے ریڈ الرٹ جاری کیا ہے۔ جس کے باعث اسکولوں اور کالجوں میں تعطیل کا اعلان کر دیا گیا ہے۔ اس کے علاوہ ناندیڑ ضلع میں 200 سے زیادہ لوگ پھنسے ہوئے ہیں، انہیں نکالنے کے لیے فوج کو بلانا پڑا۔ وزیر اعلی دیویندر فڑنویس نے تصدیق کی کہ اب تک 7 لوگوں کی موت ہو چکی ہے۔

فوج اور این ڈی آر ایف کی ٹیمیں تعینات

شدید بارش کی وجہ سے ممبئی کے اندھیری اور بوریولی میں تین گھنٹے میں ہی 50 ملی میٹر سے زیادہ بارش ہو گئی۔ بوریولی سے چرچ گیٹ تک کے علاقوں میں اگلے چند گھنٹوں میں بارش کی شدت متوقع ہے۔ کلیان کے جئے بھوانی نگر علاقے میں نیتیوالی پہاڑی پر لینڈ سلائیڈ ہوئی جس کے بعد مقامی باشندوں کو قریبی میونسپل اسکول میں منتقل کیا گیا۔ ان کے لیے کھانے اور رہائش کا بھی انتظام کیا گیا ہے۔ ضلع انتظامیہ نے یہاں فوج اور این ڈی آر ایف کی ٹیمیں تعینات کر دی ہیں۔

ودربھ خطے میں فصلیں تباہ، 800 گاؤں متاثر

فڑنویس نے وزارت میں واقع ایمرجنسی سینٹر سے صورتحال کا جائزہ لیتے ہوئے کہا کہ رتناگیری، رائے گڑھ اور ہنگولی اضلاع میں بھی شدید بارش ہوئی۔ ودربھ خطے میں دو لاکھ ہیکٹر سے زیادہ فصلیں تباہ ہوگئیں اور 800 گاؤں متاثر ہوئے۔ ممبئی میں 8 گھنٹوں میں 170 ملی میٹر بارش ریکارڈ کی گئی، جس سے 14 مقامات پر پانی جمع ہوگیا، حالانکہ صرف دو مقامات پر ٹریفک میں خلل پڑا۔

انہوں نے کہا کہ اگلے 10 سے 12 گھنٹے بہت اہم ہیں اور بلدیاتی اداروں کو چھٹیوں کا اعلان کرنے کا حق دیا گیا ہے۔ مراٹھواڑہ خطہ میں گزشتہ پانچ دنوں میں چھ لوگوں کی موت ہوئی ہے اور 205 مویشیوں کے مرنے کی اطلاع ہے۔

آدتیہ ٹھاکرے نے حکومت پر اٹھائے سوال

بارش اور پانی بھر جانے کے درمیان شیوسینا (یو بی ٹی) لیڈر آدتیہ ٹھاکرے نے بی ایم سی پر سوال اٹھائے۔ انہوں نے کہا کہ ایک گھوٹالے کی وجہ سے ممبئی کی سڑکوں کی حالت خراب ہے اور بارش میں عوام کو پریشانی کا سامنا کرنا پڑ رہا ہے۔ ٹھاکرے نے الزام لگایا کہ انتخابات نہ ہونے کی وجہ سے ریاستی حکومت تین سال سے بی ایم سی کو کنٹرول کر رہی ہے اور جوابدہی طے نہیں ہو پا رہی ہے۔ ساتھ ہی وزیر اعلیٰ نے عوام کو یقین دلایا کہ تمام ایجنسیاں صورتحال پر مسلسل نظر رکھے ہوئے ہیں اور بچاؤ کا کام جاری ہے۔

بھارت ایکسپریس۔