Union Budget 2026: بجٹ سے پہلے چھ بڑی تبدیلیاں نافذ، عام آدمی کی زندگی پر پڑے گا گہرا اثر،فروری سے مہنگائی، ہر گھر پر پڑے گا براہ راست اثر

فروری کے آغاز کے ساتھ ہی عام لوگوں کی زندگی میں کئی اہم تبدیلیاں نافذ ہو گئی ہیں، جو بجٹ سے پہلے ہی روزمرہ کے اخراجات اور سہولتوں پر اثر ڈالنے والی ہیں۔ ان تبدیلیوں میں سگریٹ اور تمباکو کی قیمتوں میں اضافہ، کمرشل گیس سلنڈر کی مہنگائی، فاسٹ ٹیگ صارفین کو راحت، قرض کے سستے ہونے کی امید، ہوائی سفر کے کرایوں میں ممکنہ کمی اور جائیداد کی رجسٹری میں آدھار کی لازمی شرط شامل ہے۔ یہ فیصلے براہ راست عام خاندانوں کے بجٹ کو متاثر کریں گے۔یکم فروری سے سگریٹ اور تمباکو مصنوعات کی قیمتوں میں نمایاں اضافہ دیکھنے کو مل سکتا ہے۔ حکومت نے پان مسالہ، گٹکھا اور کھینی جیسے تمباکو مصنوعات پر اب براہ راست چالیس فیصد جی ایس ٹی نافذ کر دیا ہے۔ اس سے پہلے ان مصنوعات پر اٹھائیس فیصد جی ایس ٹی کے ساتھ الگ سے سیس لیا جاتا تھا۔ اس کے علاوہ سگریٹ پر لمبائی کی بنیاد پر نئی ایکسائز ڈیوٹی بھی طے کی گئی ہے، جس کے باعث مارکیٹ میں سگریٹ اور تمباکو کی قیمتیں پندرہ سے چالیس فیصد تک بڑھنے کا امکان ہے۔ تاہم بیڑی پینے والوں کے لیے قدرے راحت دی گئی ہے، کیونکہ بیڑی پر جی ایس ٹی کم کر کے اٹھارہ فیصد کر دیا گیا ہے۔

فاسٹ ٹیگ استعمال کرنے والوں کے لیے اچھی خبر یہ ہے کہ نئی گاڑی، جیپ یا وین خریدنے والوں کو اب فاسٹ ٹیگ جاری کرتے وقت کے وائی وی یعنی نو یور وہیکل ویریفکیشن کی ضرورت نہیں ہوگی۔ نیشنل ہائی وے اتھارٹی آف انڈیا نے اس عمل کو ختم کر دیا ہے۔ پہلے سے فاسٹ ٹیگ لگے ہوئے گاڑیوں کے لیے بھی اب معمول کی جانچ ضروری نہیں رہے گی، صرف شکایت کی صورت میں ہی تصدیق کی جائے گی۔کمرشل گیس سلنڈر کی قیمتوں میں بھی اضافہ ہوا ہے۔ انیس کلو والا کمرشل ایل پی جی سلنڈر پچاس روپے تک مہنگا ہو گیا ہے۔ دہلی میں اس کی قیمت بڑھ کر سترہ سو چالیس روپے سے زیادہ ہو گئی ہے، جبکہ دیگر بڑے شہروں میں بھی نرخ بڑھے ہیں۔ اس سے ہوٹل، ڈھابہ اور چھوٹے کاروباریوں کی لاگت میں اضافہ ہونے کا امکان ہے۔

قرض لینے والوں کے لیے راحت کی امید نظر آ رہی ہے۔ ریزرو بینک آف انڈیا کی مانیٹری پالیسی کمیٹی کی میٹنگ چار سے چھ فروری کے درمیان ہونے والی ہے۔ امکان ظاہر کیا جا رہا ہے کہ ریپو ریٹ میں صفراعشاریہ دو پانچ فیصد کی کمی کی جا سکتی ہے۔ اگر ایسا ہوتا ہے تو ہوم لون، کار لون اور پرسنل لون کی ای ایم آئی کم ہو سکتی ہے۔ہوائی سفر کرنے والوں کے لیے بھی اچھی خبر آ سکتی ہے۔ ایوی ایشن فیول کی قیمتوں میں تقریباً ایک ہزار روپے فی کلو لیٹر کی کمی کی گئی ہے، جس سے ایئرلائنز کی لاگت گھٹے گی اور آنے والے دنوں میں ہوائی ٹکٹ سستے ہونے کی امید ہے۔جائیداد کی خرید و فروخت سے متعلق ایک بڑی تبدیلی بھی نافذ کر دی گئی ہے۔ اتر پردیش اور کرناٹک میں اب پراپرٹی رجسٹری کے لیے آدھار بایومیٹرک تصدیق لازمی کر دی گئی ہے۔ اس اقدام کا مقصد دھوکہ دہی اور بے نامی لین دین پر روک لگانا ہے۔ حکومت جلد ہی اس نظام کو پورے ملک میں نافذ کرنے کی تیاری کر رہی ہے۔

بھارت ایکسپریس اردو