Sepehran Airlines Boeing 737: اڑان کے بعد طیارے کا ٹائر ہوا الگ، مسافروں میں خوف و ہراس

نئی دہلی : ایران میں ایک بڑا طیارہ حادثہ ہوتے ہوتے ٹل گیا۔ تہران کی سیپہران ایئرلائنز کے بوئنگ 737 طیارے نے مشہد سے اڑان بھری تھی، لیکن کچھ ہی دیر بعد اسے واپس ایئرپورٹ پر اتارنا پڑا۔ پرواز کے فوراً بعد طیارے کا ایک ٹائر الگ ہو گیا، جس کے بعد انجن میں خرابی پیدا ہوگئی۔ صورتحال کو دیکھتے ہوئے پائلٹوں نے طیارے کو واپس مشہد ایئرپورٹ پر بحفاظت اتار لیا۔

ٹائر نکلنے کے بعد طیارہ بری طرح کانپنے لگا

سی این این کی رپورٹ کے مطابق دوران پرواز طیارے کا ایک ٹائر الگ ہوگیا تھا۔ یہ بھی دعویٰ کیا جا رہا ہے کہ الگ ہونے سے پہلے ٹائر پھٹ گیا تھا۔ اس کے بعد انجن میں خرابی پیدا ہوئی اور پورا طیارہ شدید جھٹکوں کے ساتھ کانپنے لگا۔ طیارے میں سوار مسافروں میں خوف و ہراس پھیل گیا۔شدید جھٹکوں کی وجہ سے طیارے کے اندر چھت کا ایک حصہ بھی ٹوٹ کر گرنے لگا۔ اس واقعے سے متعلق کئی ویڈیوز سوشل میڈیا پر وائرل ہو رہی ہیں، جن میں طیارے کے اندر پیدا ہونے والی صورتحال دیکھی جا سکتی ہے۔

پائلٹوں نے مسافروں کو کیا بتایا؟

شمال مشرقی ایران کے شہر مشہد سے یہ طیارہ کرمان شاہ کے لیے روانہ ہوا تھا۔ ٹیک آف کے فوراً بعد پائلٹوں کو طیارے میں خرابی کا علم ہوا۔ طیارے کا ٹائر الگ ہونے کے بعد پائلٹوں نے فوری طور پر مسافروں کو تکنیکی خرابی کے بارے میں اطلاع دی۔دوران پرواز طیارے میں شدید جھٹکے لگنے لگے اور وہ زور زور سے ہلنے لگا۔ صورتحال کو دیکھتے ہوئے پائلٹوں نے طیارے کا رخ دوبارہ مشہد ایئرپورٹ کی جانب موڑ دیا، جہاں اسے بحفاظت اتار لیا گیا۔

اب تک کوئی سرکاری بیان سامنے نہیں آیا

اہم بات یہ ہے کہ طیارے میں سوار کسی بھی مسافر یا عملے کے رکن کے زخمی ہونے کی اطلاع نہیں ہے۔ تمام مسافر اور عملہ محفوظ ہیں۔ تاہم شدید جھٹکوں کی وجہ سے طیارے کے اندر سامان رکھنے کے لیے بنائے گئے کئی خانے کھل گئے۔اس واقعے کے حوالے سے اب تک یئرپورٹ انتظامیہ یا متعلقہ ایئرلائن کی جانب سے کوئی باضابطہ بیان سامنے نہیں آیا ہے۔ واقعے کی مکمل وجوہات اور طیارے کو پیش آنے والی تکنیکی خرابی کی نوعیت کے بارے میں سرکاری وضاحت کا انتظار ہے۔

بھارت ایکسپریس اردو