Russia-US talk in Istanbul: روس اور امریکہ کے درمیان استنبول میں مذاکرات کا دوسرا دور، ان مدعوں پر ہوئی چرچا

استنبول: روس اور امریکہ نے جمعرات کے روز استنبول میں مذاکرات کا دوسرا دور شروع کیا۔ مذاکرات میں سفارتخانوں کے کام کو معمول پر لانے پر توجہ مرکوز کی گئی۔ اطلاعات کے مطابق استنبول میں روسی قونصلیٹ جنرل میں دونوں وفود کے درمیان بات چیت کئی گھنٹوں تک جاری رہنے کی توقع ہے۔

روسی وفد کی سربراہی واشنگٹن میں ماسکو کے سفیر الیگزینڈر ڈارچیف کر رہے ہیں جبکہ امریکی وفد کی سربراہی نائب معاون وزیر خارجہ برائے یورپی اور یوریشین امور سوناٹا کولٹر کر رہے ہیں۔

روس کی سرکاری خبر رساں ایجنسی تاس نے ایک ذریعے کے حوالے سے بتایا کہ ’’مذاکرات کا ایک بڑا حصہ پہلے ہی مکمل ہو چکا ہے، لیکن مجموعی طور پر، بات چیت میں چار یا پانچ گھنٹے لگ سکتے ہیں۔‘‘

ڈارچیف کے مطابق، روس واشنگٹن کی طرف سے غلط طریقے سے ضبط کی گئی سفارتی املاک کی واپسی کے حوالے سے امریکہ کے ساتھ سنجیدہ بات چیت کے لیے تیار ہے۔

ایجنڈے میں میزبان ملک میں سفارت کاروں کی نقل و حرکت، ویزوں اور مالی پابندیوں کے معاملات بھی شامل ہیں۔

ڈارچیف نے کہا، ’’یہ سابق امریکی انتظامیہ کی ’زہریلی میراث‘ سے نمٹنے کے بارے میں ہے، جس نے امریکہ میں روسی سفارتی مشنوں کی سرگرمیوں پر سخت پابندیاں عائد کی تھیں۔‘‘

روس امریکہ مشاورت کا آخری دور 27 فروری کو استنبول میں امریکی قونصل جنرل کی رہائش گاہ پر ہوا تھا۔ یہ ملاقات چھ گھنٹے سے زیادہ جاری رہی۔

ملاقاتوں کے پہلے دور کے اختتام کے بعد، روسی وزارت خارجہ نے کہا کہ ماسکو اور واشنگٹن نے سفارتی مشنوں کی بلا تعطل مالی امداد کو یقینی بنانے کے لیے مشترکہ اقدامات پر اتفاق کیا۔ وزارت نے مزید کہا کہ دونوں فریقوں نے دو طرفہ تعلقات میں ’متعدد مسائل‘ کو حل کرنے کے طریقوں پر تبادلہ خیال کیا۔

امریکہ اور روس کے تعلقات گزشتہ کچھ عرصے سے نمایاں طور پر بہتر ہو رہے ہیں۔ حالانکہ، تاریخی طور پر دونوں ممالک کے تعلقات کافی کشیدہ رہے ہیں۔ ٹرمپ نے دوبارہ اقتدار سنبھالنے کے بعد سے روس کے خلاف انتہائی نرم رویہ اپنایا ہے۔ وہ یوکرین جنگ کے معاملے پر بھی ماسکو کی طرف جھکاؤ رکھتے نظر آئے، جس سے کیف اور اس کے یورپی اتحادی پریشان ہو گئے ہے۔

 بھارت ایکسپریس۔