PM Modi Planted Tree ‘Ek Ped Maa Ke Naam’ Initiative: وزیر اعظم مودی نے ’یاد واشیم‘ میں ہولوکاسٹ متاثرین کو پیش کیا خراج عقیدت، اسرائیل کے صدر اسحاق ہرزوگ کے ساتھ لگایا ’ایک پیڑ ماں کے نام‘

یروشلم: اسرائیل کے سرکاری دورے کے دوسرے روز بھارت کے وزیر اعظم نریندر مودی نے عالمی شہرت یافتہ ہولوکاسٹ یادگاری مرکز یاد واشیم کا دورہ کیا، جہاں انہوں نے نازی دور حکومت میں قتل کیے گئے تقریباً 60 لاکھ یہودیوں کو خراجِ عقیدت پیش کیا۔ اس موقع پر وزیر اعظم نے یادگار پر پھول چڑھائے اور انسانی تاریخ کے اس المناک باب کے متاثرین کو احترام کے ساتھ یاد کیا۔ بھارتی وزارتِ خارجہ کے ترجمان رندھیر جیسوال نے سوشل میڈیا پلیٹ فارم ’’ایکس‘‘ پر جاری بیان میں کہا کہ وزیر اعظم کا یہ دورہ نسل کشی کے متاثرین کے لیے احترام اور عالمی امن کے عزم کی علامت ہے۔ بیان کے مطابق وزیر اعظم مودی نے ’’بک آف نیمز ہال‘‘ کا بھی دورہ کیا، جہاں ہولوکاسٹ میں جان گنوانے والے لاکھوں افراد کے نام محفوظ کیے گئے ہیں۔

وزارتِ خارجہ کے مطابق یہ یادگار دنیا کو ماضی کے ظلم، نفرت اور ناانصافی کے خلاف متحد ہو کر کھڑے ہونے اور ایک بہتر مستقبل کی تعمیر کی یاد دلاتی ہے۔ وزیر اعظم مودی نے یادگار میں خاموشی اختیار کرتے ہوئے انسانیت کے تحفظ اور امن کے پیغام کو دہرانے کی ضرورت پر زور دیا۔ یاد واشیم کے دورے کے بعد وزیر اعظم مودی نے اسرائیل کے صدر اسحاق ہرزوگ سے ملاقات کی، جس میں بھارت اور اسرائیل کے درمیان اسٹریٹجک شراکت داری کو مزید مضبوط بنانے پر تبادلہ خیال کیا گیا۔ دونوں لیڈروں نے تعلیم، اسٹارٹ اپس، اختراع، ٹیکنالوجی اور عوامی روابط کے شعبوں میں تعاون بڑھانے کے امکانات پر تفصیلی گفتگو کی۔

ملاقات کے بعد دونوں لیڈروں نے صدارتی باغ میں بھارت کی ماحول دوست مہم ’’ایک پیڑ ماں کے نام‘‘ کے تحت مشترکہ طور پر ایک پودا لگایا۔ اس موقع پر وزیر اعظم مودی نے کہا کہ یہ اقدام نہ صرف ماحول کے تحفظ بلکہ ماں کے احترام اور آئندہ نسلوں کے محفوظ مستقبل کی علامت ہے۔ انہوں نے صدر ہرزوگ کو جلد بھارت کے سرکاری دورے کی دعوت بھی دی۔

وزیر اعظم مودی کا دو روزہ اسرائیلی دورہ جمعرات کو اختتام پذیر ہو رہا ہے۔ اس سے قبل وہ اسرائیلی پارلیمنٹ سے خطاب کرنے والے پہلے بھارتی وزیر اعظم بنے، جہاں انہیں پارلیمنٹ کا اعلیٰ اعزاز ’’اسپیکر آف دی کنیسٹ میڈل‘‘ بھی عطا کیا گیا۔ دورے کے آغاز پر اسرائیلی وزیر اعظم اور ان کی اہلیہ نے ہوائی اڈے پر وزیر اعظم مودی کا پرتپاک استقبال کیا تھا۔ اپنے خطاب میں اسرائیلی قیادت نے وزیر اعظم مودی کو قریبی دوست قرار دیتے ہوئے دونوں ممالک کے تعلقات کو نئی بلندیوں تک لے جانے کے عزم کا اظہار کیا۔ مبصرین کے مطابق یہ دورہ سفارتی، ثقافتی اور انسانی اقدار کے فروغ کے حوالے سے انتہائی اہم قرار دیا جا رہا ہے۔

بھارت ایکسپریس اردو۔