اسرائیل کو لگا بڑا جھٹکا، یوروپی ممالک نے فلسطین کو آزاد ملک ماننے کا کیا اعلان

پرتگال نے فلسطین اتھارٹی کو منظوری دینے کا اعلان کیا ہے۔

اسرائیل-فلسطین جدوجہد کے درمیان 22 ستمبرکونیویارک میں اقوام متحدہ جنرل اسمبلی کی ایک اہم میٹنگ ہونے جا رہی ہے۔ اس میٹنگ میں دوممالک کے حل پرخصوصی طورپرتبادلہ خیال کیا جائے گا۔ اس سے ٹھیک ایک دن پہلے یوروپی ملک پرتگال نے اسرائیلی وزیر اعظم بنجامن نیتن یاہوکوبڑا جھٹکا دیتے ہوئے اعلان کیا ہے کہ وہ باضابطہ طورپرفلسطین کوآزاد ملک کے طورپرمنظوری دے گا۔

میٹںگ میں مغربی اوریوروپی ممالک کے بھی فلسطین کومنظوری دینے کی امید ہے۔ اسرائیل نے ان تسلیمات کی شدید مخالفت کی ہے۔ تل ابیب کا کہنا ہے کہ یہ اقدام حماس کوانعام دینے کے مترادف ہے، جس نے 7 اکتوبر2023 کوغزہ جنگ کا آغازکیا تھا۔ اسرائیلی حکومت کا موقف ہے کہ فلسطین کوتسلیم کرنے سے دہشت گردی کی حوصلہ افزائی ہوگی اورامن عمل کونقصان پہنچے گا۔

پرتگال کا بڑا فیصلہ

پرتگال نے باضابطہ طورپراعلان کیا ہے کہ وہ 21 ستمبر، اتوارکو فلسطین کوآزاد ریاست کے طورپرمنظوری دے گا۔ پرتگال کے وزارت خارجہ نے جمعہ کے روزبیان جاری کرکے اس کی جانکاری دی۔ لسبن نے جولائی میں ہی واضح کردیا تھا کہ مسلسل بگڑتے حالات، انسانی بحران اوراسرائیل کی باربارکی دھمکیوں کے بعد یہ قدم اب ضروری ہوگیا ہے۔

کئی ممالک دینے والے ہیں منظوری

فرانس کے صدر ایمینوئل میکرون کے مشیرکے مطابق، اینڈورا، آسٹریلیا، بیلجیم، لکسمبرگ، مالٹا اورسینی مرینوجیسے ملک بھی فلسطین کو منظوری دینے کی تیاری میں ہیں۔ اس کے علاوہ برطانیہ، کناڈا اورفرانس جیسے بڑے مغربی ممالک بھی اس بارجنرل اسمبلی میں فلسطین کو منظوری دینے کا اعلان کرسکتے ہیں۔ فی الحال، اقوام متحدہ کے 193 اراکین ممالک میں سے تقریباً تین چوتھائی فلسطین کو پہلے ہی منظوری دے چکے ہیں۔

اقوام متحدہ کی جنرل اسمبلی میں ہوگا اہم ایجنڈا

نیویارک میں 22 ستمبرکوشروع ہونے والی جنرل اسمبلی میں “دوریاستی حل” پربڑے پیمانے پربحث کی جائے گی۔ اس دوران فرانس اور سعودی عرب مشترکہ طورپرایک بین الاقوامی کانفرنس بلائیں گے، جس میں ناروے اوراسپین بھی شرکت کریں گے۔ اس کانفرنس کا بنیادی مقصد فلسطینی اتھارٹی (پی اے) کواس کے مالی بحران سے نجات دلانا ہے۔ اسرائیل نے فلسطینی اتھارٹی کے لئے جمع کئے گئے لاکھوں ڈالرکے فنڈزکوچارمہینوں کے لیے روک رکھا ہے، جس سے اس کی مالی صورتحال خراب ہوگئی ہے۔

بھارت ایکسپریس اردو-