PM Modi Netherlands Visit: اب ڈچ یونیورسٹیوں میں پڑھنا ہوگا آسان! وزیر اعظم مودی کے دورے سے بھارتی طلبہ اور کسانوں کے لیےکھلے مواقع

وزیر اعظم نریندر مودی کا حالیہ نیدرلینڈس دورہ بھارت-ڈچ تعلقات میں ایک نئے سنگِ میل کے طور پر سامنے آیا ہے۔ اس دورے کے دوران معیشت، ٹیکنالوجی اور ثقافتی وراثت سمیت 17 اہم شعبوں میں اسٹریٹجک معاہدوں پر مہر لگائی گئی۔وزیر اعظم مودی کے نیدرلینڈس دورے میں سیمی کنڈکٹر، توانائی اور زراعت جیسے 17 اہم شعبوں میں اسٹریٹجک معاہدے طے پائے۔ اس دوران چولا دور کی تاریخی تانبے کی تختیوں کی بھارت واپسی بھی عمل میں آئی، جبکہ ویزا قوانین کو آسان بنانے پر بھی اتفاق کیا گیا۔ ان معاہدوں سے ’ڈیجیٹل انڈیا‘ اور ’وکست بھارت 2047‘ کے اہداف کو عالمی سطح پر نئی مضبوطی ملنے کی امید ہے۔

اسٹریٹجک روڈ میپ اور ثقافتی وراثت کی واپسی

بھارت اور نیدرلینڈس نے ’اسٹریٹجک شراکت داری 2030-2026‘ کے لیے ایک مشترکہ روڈ میپ تیار کیا ہے۔ اس کا مقصد سرمایہ کاری، محفوظ خوراک، صاف پانی اور صحت کے نظام کو مزید مضبوط بنانا ہے۔ اس دورے کی سب سے جذباتی کامیابی چولا دور کی تاریخی تانبے کی تختیوں کی بھارت واپسی رہی، جس نے ’ترقی بھی، وراثت بھی‘ کے عزم کو حقیقت کا روپ دیا۔اس کے ساتھ ہی، ہجرت اور نقل و حرکت سے متعلق معاہدے کے تحت اب بھارتی طلبہ اور پیشہ ور افراد کے لیے ڈچ ویزا عمل مزید آسان اور تیز ہو جائے گا۔

ٹیکنالوجی اور توانائی کے شعبے میں بڑی پیش رفت

مستقبل کی ضروریات کو مدنظر رکھتے ہوئے سیمی کنڈکٹر اور توانائی کے شعبوں میں تاریخی اقدامات کیے گئے ہیں۔ ٹاٹا الیکٹرانکس اور اے ایس ایم ایل (ASML) کے درمیان تعاون سے گجرات کے دھولیرا میں سیمی کنڈکٹر ایکو سسٹم کو مضبوطی ملے گی۔اس کے علاوہ بھارت کو عالمی گرین ہائیڈروجن ہب (Global Green Hydrogen Hub) بنانے کے لیے خصوصی روڈ میپ تیار کیا گیا ہے اور اہم معدنیات (Critical Minerals) کی سپلائی چین پر بھی اتفاق ہوا ہے۔نیتی آیوگ اور ڈچ حکومت مل کر توانائی کی منتقلی اور قابلِ تجدید توانائی کے شعبے میں مشترکہ منصوبوں پر کام کریں گے۔

زراعت، ڈیری اور تعلیم کے شعبے میں ترقی

کسانوں کی آمدنی بڑھانے کے مقصد سے مغربی تریپورہ میں ’فلاور ایکسیلینس سینٹر‘ (Flower Excellence Center) اور بنگلورو میں ’ڈیری ٹریننگ سینٹر آف ایکسیلینس‘ (Dairy Training Center of Excellence) قائم کیے جائیں گے۔ صحت کے شعبے میں تحقیق اور کسٹمز معاہدوں کے ذریعے دوطرفہ تجارت کو بھی آسان بنایا جائے گا۔ تعلیم کے شعبے میں نالندہ یونیورسٹی اور گروننگن یونیورسٹی کے درمیان تعاون سے بھارتی طلبہ کو عالمی سطح پر بہتر مواقع اور تجربات حاصل ہوں گے، جبکہ آرکیالوجیکل سروے آف انڈیا اور لیڈن یونیورسٹی مل کر چولا تاریخ پر تحقیق کو آگے بڑھائیں گے۔

بھارت ایکسپریس اردو۔