PM Modi Congratulates Nikol Pashinyan On Election Victory: وزیر اعظم مودی نے وزیر اعظم نکول کو آرمینیا کے پارلیمانی انتخابات میں جیت پر دی مبارکباد، سِوک کنٹریکٹ پارٹی کو ملے سب سے زیادہ ووٹ

آرمینیا کے حالیہ پارلیمانی انتخابات میں وزیر اعظم نکول پاشینیان کی جماعت سِوک کنٹریکٹ پارٹی نے نمایاں کامیابی حاصل کرتے ہوئے سیاسی میدان میں اپنی مضبوط پوزیشن برقرار رکھی ہے۔ انتخابی نتائج کے بعد بھارت کے وزیر اعظم نریندر مودی نے آرمینیائی وزیر اعظم نکول پاشینیان کو مبارکباد پیش کرتے ہوئے دونوں ممالک کے درمیان تاریخی دوستی اور تعاون کو مزید مستحکم بنانے کے عزم کا اظہار کیا ہے۔ آرمینیا میں 7 جون کو ہونے والے پارلیمانی انتخابات کے ابتدائی نتائج کے مطابق سِوک کنٹریکٹ پارٹی تقریباً 49.81 فیصد ووٹ حاصل کرکے سب سے بڑی جماعت بن کر ابھری ہے۔ انتخابی کمیشن کی جانب سے جاری اعداد و شمار کے مطابق روسی نژاد آرمینیائی ارب پتی سامویل کاراپیتیان کی قیادت میں قائم ’’اسٹرانگ آرمینیا الائنس‘‘ 23.29 فیصد ووٹوں کے ساتھ دوسرے نمبر پر رہا، جبکہ سابق صدر رابرٹ کوچاریان کے ’’آرمینیا الائنس‘‘ نے 9.94 فیصد ووٹ حاصل کیے۔ ’’پروسپیرس آرمینیا پارٹی‘‘ بھی چار فیصد سے زائد ووٹ حاصل کرکے انتخابی حد عبور کرنے میں کامیاب رہی۔

Congratulations to Mr. Nikol Pashinyan on the impressive victory of the Civil Contract Party in the parliamentary elections. The renewed mandate reflects the enduring trust and confidence of the people of Armenia in your leadership and vision. I look forward to working closely…

— Narendra Modi (@narendramodi) June 8, 2026

وزیر اعظم نریندر مودی نے سوشل میڈیا پلیٹ فارم ایکس پر اپنے پیغام میں کہا کہ پارلیمانی انتخابات میں سِوک کنٹریکٹ پارٹی کی شاندار کامیابی پر نکول پاشینیان کو دلی مبارکباد پیش کرتا ہوں۔ انہوں نے کہا کہ یہ نیا عوامی مینڈیٹ آرمینیا کے عوام کے اپنے قائد کی قیادت، وژن اور پالیسیوں پر اعتماد کا واضح اظہار ہے۔ مودی نے مزید کہا کہ وہ بھارت اور آرمینیا کے درمیان تاریخی تعلقات اور باہمی تعاون کو نئی بلندیوں تک پہنچانے کے لیے پاشینیان کے ساتھ مل کر کام کرنے کے خواہاں ہیں۔ یہ یہ انتخابی نتیجہ ایسے وقت میں سامنے آیا ہے جب روس اور یوکرین کے درمیان جاری جنگ کے باعث خطے کی سیاسی صورتحال مسلسل تبدیلیوں سے گزر رہی ہے۔ پاشینیان کی جماعت کی کامیابی کو مغربی ممالک اور یورپی یونین نے بھی مثبت پیش رفت قرار دیتے ہوئے مبارکباد دی ہے۔

گزشتہ چند ماہ کے دوران آرمینیا اور روس کے تعلقات میں بعض معاملات پر کشیدگی دیکھنے میں آئی تھی۔ روسی صدر ولادیمیر پوتن نے حال ہی میں خبردار کیا تھا کہ اگر آرمینیا مغربی ممالک اور یورپی یونین کے ساتھ زیادہ قریبی تعلقات استوار کرتا ہے تو اسے بعض اقتصادی فوائد سے محروم ہونا پڑ سکتا ہے۔ روس اس وقت آرمینیا کو رعایتی نرخوں پر قدرتی گیس فراہم کرتا ہے، جبکہ یورپی منڈیوں میں گیس کی قیمتیں اس سے کہیں زیادہ ہیں۔ انتخابات سے قبل روس نے آرمینیائی پھولوں، معدنی پانی، کونیاک، تازہ سبزیوں اور پھلوں کی درآمدات پر پابندی بھی عائد کی تھی، جسے سیاسی حلقوں میں اہم پیش رفت قرار دیا گیا تھا۔ پیر کی صبح پریس کانفرنس سے خطاب کرتے ہوئے نکول پاشینیان نے اپنی جماعت کی کامیابی کو ’’تاریخی فتح‘‘ قرار دیا اور کہا کہ عوام نے ایک بار پھر اصلاحات، جمہوریت اور قومی ترقی کے حق میں فیصلہ دیا ہے۔

بھارت ایکسپریس اردو۔