Israel-Iran Tensions: اسرائیل نے ایرانی نیوکلیئر ریسرچ ہیڈ کوارٹرز کو نشانہ بنانے کا کیا دعویٰ، کئی مقامات پر کیے حملے

تل ابیب: اسرائیل ڈیفنس فورس (IDF) نے جمعہ کے روز اعلان کیا کہ اس نے جمعرات کی شب تہران میں کئی فضائی حملے کیے، جس میں ایران کے میزائل اور جوہری ہتھیاروں کے پروگرام سے منسلک متعدد مقامات کو نشانہ بنایا گیا۔ ان حملوں میں میزائل بنانے والی فوجی صنعتی یونٹس، ایران کی ڈیفنس انوویشن اینڈ ریسرچ آرگنائزیشن (SPND) کا ہیڈکوارٹر شامل تھا۔

آئی ڈی ایف نے سوشل میڈیا پلیٹ فارم ایکس پر ایک پوسٹ میں لکھا، ’’60 سے زائد فضائیہ کے لڑاکا طیاروں نے جمعرات کی رات ایران میں کئی فوجی اہداف پر حملہ کیا، جس میں تقریباً 120 ہتھیار استعمال کیے گئے۔ اس میں تہران کے علاقے میں میزائل بنانے والے کئی صنعتی یونٹ بھی شامل تھے۔‘‘

پوسٹ میں مزید کہا گیا، ’’یہ اڈے کئی سالوں میں تعمیر کیے گئے تھے اور یہ ایران کی وزارت دفاع کا صنعتی مرکز تھے۔ حملہ کیے گئے اہداف میں میزائل کے پرزوں کی تیاری کے لیے فوجی صنعتی مقامات اور راکٹ انجن بنانے کے لیے خام مال کی پیداوار کی جگہیں شامل تھیں۔‘‘

SPND کے ہیڈ کوارٹر کی عمارت پر حملہ

آئی ڈی ایف نے کہا کہ ایران کے جوہری ہتھیاروں کے منصوبے کو نقصان پہنچانے کی اپنی کارروائی کے تحت تہران میں ایس پی این ڈی کے ہیڈ کوارٹر کی عمارت پر بھی حملہ کیا گیا۔ IDF نے کہا، ’’SPND ہیڈکوارٹر کو ایران کی فوجی صلاحیتوں کے لیے جدید ٹیکنالوجی اور ہتھیاروں کی تحقیق اور ترقی کے لیے استعمال کیا جاتا ہے، جسے 2011 میں ایران کے جوہری ہتھیاروں کے پروگرام کے بانی فخری زادہ نے قائم کیا تھا۔‘‘

اسرائیل اور ایران کے درمیان تنازعہ جاری

اس کے علاوہ اسرائیلی فوج نے دعویٰ کیا کہ ایران کے جوہری ہتھیاروں کے پروگرام کے لیے ضروری سائٹ پر حملہ کیا گیا۔ IDF نے یہ بھی کہا کہ رات کے وقت اسرائیلی فضائیہ نے ایران کی طرف سے لانچ کیے گئے چار بغیر پائلٹ ڈرون کو روک دیا ہے۔ اسرائیل اور ایران کے درمیان بڑھتا ہوا تنازعہ مسلسل آٹھویں روز میں داخل ہو گیا ہے۔ IDF نے اعلان کیا ہے کہ اس نے حال ہی میں ایران سے اسرائیل کو نشانہ بنانے والے میزائلوں کا پتہ لگایا ہے۔