Houthis Seize Strategic Kharaz Military Base: حوثی باغیوں نے اسٹریٹجک خرَج فوجی اڈے پر کیا قبضہ، عدن کی سلامتی سے متعلق تشویش میں اضافہ

صنعاء: یمن کے حوثی جنگجوؤں نے اتوار کی علی الصبح جنوبی صوبے لحج میں کئی اہم فوجی ٹھکانوں پر قبضہ کر لیا۔ اس کے نتیجے میں وہ بندرگاہی شہر عدن کے مزید قریب پہنچ گئے ہیں۔ دوسری جانب سعودی عرب کی قیادت والے اتحاد کی حمایت یافتہ سرکاری فوج کو حوثیوں کے بڑھتے ہوئے حملوں کو روکنے میں مشکلات کا سامنا ہے۔

خرَج فوجی اڈے اور پہاڑی چوکیوں پر قبضہ

ژنہوا کی رپورٹ کے مطابق، فوجی ذرائع نے بتایا کہ حوثیوں نے لحج کے ’المضاربہ والعارہ‘ ضلع میں واقع اسٹریٹجک اہمیت کے حامل خرَج فوجی اڈے اور اس کے آس پاس کی کئی پہاڑی چوکیوں پر قبضہ کر لیا ہے۔ یہ علاقہ آبنائے باب المندب اور خلیج عدن کے قریب واقع ہے۔ قبضے سے پہلے دونوں فریقوں کے درمیان شدید لڑائی ہوئی، جس کے بعد سرکاری فوجیوں کو پیچھے ہٹنا پڑا۔

موقع پر موجود ایک فوجی ذریعے نے کہا کہ خرَج فوجی اڈے کا ہاتھ سے نکلنا سرکاری فوج کے لیے بڑا دھچکا ہے۔ یہ اڈہ عدن کے مغربی حصے کی حفاظت کے لیے ایک اہم دفاعی حصار سمجھا جاتا تھا۔ اس کے علاوہ آبنائے باب المندب جانے والے راستوں کی نگرانی میں بھی اس کا اہم کردار تھا۔

ذریعے نے کہا، ’’حوثی مسلسل عدن کے قریب پہنچ رہے ہیں، جبکہ سرکاری فوج اپنی پوزیشن کھوتی جا رہی ہے۔‘‘ انہوں نے بتایا کہ پیچھے ہٹنے والے فوجی اب شہر کے مغربی حصے میں نئی حفاظتی چوکیاں اور مورچے تیار کر رہے ہیں، تاکہ حوثیوں کی پیش قدمی کو روکا جا سکے۔

حوثی مخالف گروپوں میں اختلافات سے صورتحال مزید خراب

ژنہوا کی رپورٹ کے مطابق، ایک دوسرے فوجی ذریعے نے ان ناکامیوں کے لیے جزوی طور پر ’جائنٹس بریگیڈ‘ کو ذمہ دار ٹھہرایا۔ یہ ایک طاقتور فوجی دستہ ہے، جسے پہلے عدن میں قائم کیا گیا تھا۔ ذریعے کے مطابق، اس دستے کو توقع سے کہیں زیادہ تیزی سے شکست کا سامنا کرنا پڑا، جو سعودی عرب کی حمایت یافتہ موجودہ فوجی نظام کے تحت اس کی کمزور ہوتی جنگی صلاحیت کو ظاہر کرتا ہے۔

انہوں نے کہا کہ حوثی مخالف گروپوں کے درمیان اختلافات بھی صورتحال کو مزید خراب کر رہے ہیں۔ خاص طور پر سعودی عرب اور سدرن ٹرانزیشنل کونسل (ایس ٹی سی) کے درمیان کشیدگی تشویش کا باعث ہے۔ ایس ٹی سی جنوبی یمن کی ایک بااثر علیحدگی پسند تنظیم ہے، جس کے پاس اچھی خاصی فوجی طاقت ہے، لیکن اس نے حالیہ فوجی مہم میں زیادہ حصہ نہیں لیا ہے۔ فوجی ذریعے نے خبردار کرتے ہوئے کہا، ’’اگر جنوبی فوجی دستوں کو کمزور کیا گیا تو حوثیوں کو آگے بڑھنے کے مزید مواقع مل جائیں گے۔‘‘

آبنائے باب المندب پر کنٹرول کی کوششوں کو دھچکا

حوثیوں کی یہ پیش قدمی سعودی عرب کی قیادت والے اتحاد کے لیے ایک نیا چیلنج بن کر سامنے آئی ہے۔ اتحاد آبنائے باب المندب پر اپنا کنٹرول مضبوط کرنے کے لیے مہم چلا رہا ہے۔ یہ دنیا کے اہم ترین سمندری راستوں میں سے ایک ہے، جو بحیرہ احمر کو خلیج عدن سے جوڑتا ہے۔

تاہم مسلسل فوجی کارروائیوں کے باوجود سعودی عرب کی حمایت یافتہ سرکاری فوج حوثیوں کی پیش قدمی روکنے میں کامیاب نہیں ہو سکی ہے۔ اس کے ساتھ ہی اتحادی گروپوں کے درمیان بڑھتے ہوئے اختلافات نے اسٹریٹجک علاقوں پر دوبارہ کنٹرول حاصل کرنے کی کوششوں کو مزید مشکل بنا دیا ہے۔ واضح رہے کہ یمن میں 2014 کے اواخر سے تنازع جاری ہے، جب حوثیوں نے دارالحکومت صنعاء اور شمالی یمن کے بڑے حصے پر قبضہ کر لیا تھا۔ اس کے بعد 2015 میں سعودی عرب کی قیادت والے فوجی اتحاد نے بین الاقوامی سطح پر تسلیم شدہ یمنی حکومت کی حمایت میں مداخلت کی تھی۔

بھارت ایکسپریس۔