Strait of Hormuz: ایران کے خلاف بحری ناکہ بندی صرف ایرانی بندرگاہوں سے آنے اور جانے والے جہازوں تک محدود، امریکی بحریہ محفوظ آمدورفت بنا رہی ہے یقینی: وائٹ ہاؤس

واشنگٹن: وائٹ ہاؤس نے کہا ہے کہ آبنائے ہرمز اُن تمام تجارتی بحری جہازوں کے لیے کھلا ہوا ہے جو ایرانی بندرگاہوں سے نہ آ رہے ہوں اور نہ ہی وہاں جا رہے ہوں۔ امریکی انتظامیہ کے مطابق ایران کے خلاف عائد بحری ناکہ بندی صرف ایرانی بندرگاہوں سے متعلق جہازوں پر لاگو ہے، جبکہ دیگر تجارتی جہازوں کی محفوظ آمدورفت یقینی بنانے کے لیے امریکی بحریہ تعینات ہے۔ وائٹ ہاؤس کی پریس سکریٹری کیرولین لیویٹ نے ایک پریس بریفنگ کے دوران کہا کہ صدر کے حکم پر نافذ کی گئی بحری ناکہ بندی صرف ان جہازوں پر لاگو ہوتی ہے جو ایرانی بندرگاہوں کی جانب جا رہے ہوں یا وہاں سے روانہ ہو رہے ہوں۔ انہوں نے کہا کہ یہ ناکہ بندی اس لیے دوبارہ نافذ کی گئی کیونکہ امریکی مؤقف کے مطابق ایران امریکہ کے ساتھ اپنے معاہدے کی پاسداری کرنے میں ناکام رہا ہے۔

امریکی فوج کی بڑے پیمانے پر تعیناتی

کیرولین لیویٹ نے بتایا کہ اس کارروائی کے لیے خطے میں 10 ہزار سے زائد امریکی بحریہ، میرینز اور فضائیہ کے اہلکار، دو طیارہ بردار بحری جہاز، 20 سے زیادہ جنگی بحری جہاز اور درجنوں فوجی طیارے تعینات کیے گئے ہیں۔ ان کے مطابق یہ تمام فورسز اس وقت بحری ناکہ بندی پر عمل درآمد کو یقینی بنا رہی ہیں۔ وائٹ ہاؤس کے مطابق ناکہ بندی کے پہلے 24 گھنٹوں کے دوران امریکی سینٹرل کمانڈ (CENTCOM) نے دو تجارتی جہازوں کا رخ تبدیل کروایا، جنہوں نے امریکی ہدایات پر عمل کیا، جبکہ ایک ایسے جہاز کو ناکارہ بنا دیا گیا جس نے ان ہدایات پر عمل نہیں کیا۔

دیگر تجارتی جہازوں کی آمدورفت جاری

کیرولین لیویٹ نے واضح کیا کہ ایرانی بندرگاہوں سے غیر متعلق تجارتی جہاز معمول کے مطابق آبنائے ہرمز سے گزر سکتے ہیں۔ انہوں نے کہا ’’آبنائے ہرمز اُن تمام جہازوں کے لیے کھلی ہے جو ایرانی بندرگاہوں سے منسلک نہیں ہیں، اور امریکی بحریہ اس بات کو یقینی بنا رہی ہے کہ ان کی آمدورفت بلا رکاوٹ جاری رہے۔‘‘ امریکی سینٹرل کمانڈ (CENTCOM) نے منگل کے روز اعلان کیا تھا کہ ایران کی بندرگاہوں اور ساحلی علاقوں سے آنے اور جانے والے بحری جہازوں کے خلاف بحری ناکہ بندی دوبارہ نافذ کر دی گئی ہے۔ سینٹ کام کے مطابق اس کارروائی کا مقصد ان ایرانی صلاحیتوں کو محدود کرنا ہے جنہیں واشنگٹن آبنائے ہرمز میں تجارتی جہاز رانی کے لیے خطرہ قرار دیتا ہے۔ ادارے نے بتایا کہ اس مشن کے لیے خطے میں 20 سے زائد امریکی جنگی بحری جہاز اور سیکڑوں فوجی طیارے تعینات ہیں۔

بھارت ایکسپریس اردو۔