Flight Groundings in the US: امریکہ میں فضائی بحران، 4000 سے زائد پروازیں منسوخ، کم سے کم827 ڈائی ورٹ ، جانئے کیا تھی فضائی بحران کی وجہ؟

نئی دہلی : امریکہ میں فضائی نظام میں پیدا ہونے والی بڑی تکنیکی خرابی نے ہوائی سفر کو بری طرح متاثر کیا ہے۔ ملک بھر میں پروازوں پر پابندی کے باعث 4000 سے زائد پروازیں منسوخ کر دی گئیں، جب کہ 10 ہزار سے زیادہ پروازیں تاخیر کا شکار ہوئیں۔ امریکہ کے وفاقی محکمہ ہوا بازی (ایف اے اے) نے جمعہ کی رات ملک بھر میں پروازوں پر عائد پابندی (گراؤنڈ اسٹاپ) ہٹا دی۔ دراصل، ایئر ٹریفک کنٹرول سسٹم میں بڑی تکنیکی خرابی کے باعث جمعہ کی دوپہر تمام پروازیں روک دی گئی تھیں۔ اس کے نتیجے میں ہزاروں پروازیں متاثر ہوئیں اور لاکھوں مسافروں کے سفری منصوبے درہم برہم ہو گئے۔

کیا تھی فضائی بحران کی وجہ؟

ٹرمپ انتظامیہ کے حکام اور ہوم لینڈ سکیورٹی کے وزیر مارک وین مولن کے مطابق، یہ بحران پرانے اور ضرورت سے زیادہ بوجھ تلے دبے نظام کی وجہ سے پیدا ہوا۔ پرانے ایئر ٹریفک کنٹرول سسٹم میں نئی ٹیکنالوجی شامل کرنے کے دوران مواصلاتی نظام میں خرابی پیدا ہو گئی، جس سے پروازوں کی نگرانی اور رابطے کا نظام متاثر ہوا۔حکام نے واضح کیا ہے کہ فی الحال اس واقعے کے پیچھے کسی سائبر حملے یا سازش کے شواہد نہیں ملے ہیں۔

لاکھوں مسافروں کو پریشانی کا سامنا

پروازوں پر عائد پابندی ہٹائے جانے کے باوجود فضائی خدمات فوری طور پر معمول پر آنے کا امکان نہیں تھا، کیونکہ بڑی تعداد میں طیارے اور عملے کے ارکان اپنی مقررہ جگہوں سے دور ہو چکے تھے۔ایوی ایشن ڈیٹا کمپنی ‘سیریم’ کے مطابق، کم از کم 827 پروازوں کا رخ تبدیل کرنا پڑا۔ ان میں سے 670 طیاروں کو واپس اسی ہوائی اڈے پر لوٹنا پڑا جہاں سے انہوں نے پرواز بھری تھی۔جمعہ کی شام 4 بجے کے بعد امریکہ سے تقریباً 11 ہزار پروازیں روانہ ہونے والی تھیں، جن میں 15 لاکھ سے زائد مسافروں کو سفر کرنا تھا۔نیویارک اور لاس اینجلس جیسے بڑے ہوائی اڈوں پر مسافر گھنٹوں پھنسے رہے اور کئی لوگوں کو اپنا سفر منسوخ کرنا پڑا۔ اس کے علاوہ این بی اے، این ایچ ایل اور کالج کی کئی کھیلوں کی ٹیمیں بھی راستے میں پھنس گئیں، جبکہ سامان لے جانے والی کارگو پروازیں بھی تاخیر کا شکار ہوئیں۔

فضائی پابندی کے دوران اسپیس ایکس کا تجربہ کامیاب

امریکہ میں ایک طرف فضائی نظام کی خرابی کے باعث ہزاروں پروازیں متاثر ہوئیں، تو دوسری جانب اسپیس ایکس نے ٹیکساس سے اپنے اسٹار شپ راکٹ کا تجربہ کامیابی کے ساتھ جاری رکھا۔ اس طرح ملک بھر میں فضائی سفر کے شدید بحران کے باوجود خلائی تجربے کا سلسلہ متاثر نہیں ہوا۔

بھارت ایکسپریس اردو