Ceasefire in Gaza: غزہ میں جنگ بندی کا راستہ صاف، حماس نے رہا کیے جانے والے تین اسرائیلی یرغمالیوں کے نام کیے جاری

تل ابیب: حماس نے تین خواتین یرغمالیوں کے نام منظر عام پر لائے ہیں۔ ان تینوں کو غزہ جنگ بندی معاہدے کے تحت اتوار کو رہا کیا جائے گا۔ حماس کے اس اعلان کی وجہ سے بالآخر کئی گھنٹے کی تاخیر کے بعد جنگ بندی شروع ہونے کا راستہ صاف ہو گیا۔ اس سے پہلے اسرائیل نے کہا تھا کہ اتوار کے روز پہلے سے طے شدہ جنگ بندی اس وقت تک عمل میں نہیں آئے گی جب تک فلسطینی گروپ تین یرغمالیوں کے ناموں کی فہرست حوالے نہیں کرتا۔

الجزیرہ کے مطابق حماس کے ترجمان نے ٹیلی گرام پر ایک پوسٹ میں کہا کہ غزہ میں جنگ بندی کے معاہدے کے پہلے دن حماس نے تین اسرائیلی قیدیوں کے نام جاری کیے ہیں جنہیں رہا کیا جانا ہے۔

رپورٹ کے مطابق حماس کے مسلح ونگ قسام بریگیڈز کے ترجمان ابو عبیدہ نے کہا، ’’قیدیوں کے تبادلے کے معاہدے کے ایک حصے کے طور پر ہم نے آج 24 سالہ رومی گونن، 28 سالہ ایملی دماری، اور 31 سالہ اسٹین بریچر کو رہا کرنے کا فیصلہ کیا ہے۔‘‘

وزیر اعظم بنجمن نیتن یاہو کے دفتر کا کہنا ہے کہ غزہ میں قید تین یرغمالیوں کی رہائی GMT وقت کے مطابق دوپہر 2 بجے کے بعد کی ہوگی۔ ایک بیان میں، اس نے یہ بھی کہا کہ چار دیگر زندہ خواتین یرغمالی سات دنوں میں رہا ہوں گی۔

بتا دیں کہ چھ ہفتے کے ابتدائی جنگ بندی کے مرحلے میں وسطی غزہ سے اسرائیلی افواج کا دھیرے دھیرے انخلا اور بے گھر فلسطینیوں کی شمالی غزہ میں واپسی شامل ہے۔

اس معاہدے کے تحت غزہ میں ہر روز انسانی امداد کے 600 ٹرکوں کو جانے کی اجازت دی جائے گی۔ ان میں سے 50 ایندھن لے جانے والے ٹرک اور 300 ٹرک شمال کے لیے مختص کیے گئے ہیں، جہاں عام شہری سنگین صورتحال کا سامنا کر رہے ہیں۔

اسرائیلی میڈیا کے مطابق تینوں خواتین کو 7 اکتوبر 2023 کو حماس کے حملے کے دوران یرغمال بنایا گیا تھا۔ گونن کو نووا فیسٹیول سے اغوا کیا گیا تھا، جب کہ برطانوی اسرائیلی شہریت رکھنے والے دماری اور اسٹین بریچر کو کبٹز کفر ازا میں ان کے گھروں سے اغوا کیا گیا تھا۔

بتا دیں کہ ثالثی قطر کے اعلان کے مطابق اتوار کی صبح 8.30 بجے شروع ہونا تھا لیکن ایسا نہیں ہو سکا۔ وزیراعظم بنجمن نیتن یاہو نے کہا کہ اسرائیل کو ابھی تک حماس کی طرف سے یرغمالیوں کی فہرست موصول نہیں ہوئی جو اتوار کو رہا کیے جائیں گے۔ جس کی وجہ سے جنگ بندی کے آغاز میں تاخیر ہوگی۔

وزیر اعظم نیتن یاہو نے ’’آئی ڈی ایف کو ہدایت دی کہ جنگ بندی، جو صبح 8:30 بجے سے نافذ ہونا تھی، اس وقت تک شروع نہیں ہوگی جب تک کہ اسرائیل کو یرغمالیوں کی رہائی کی فہرست نہیں مل جاتی، جسے حماس نے دستیاب کرانے کا وعدہ کیا ہے۔‘‘

اس دوران غزہ میں آئی ڈی ایف کے حملے جاری ہیں۔ حماس کے زیر انتظام شہری دفاع کے ادارے نے بتایا کہ اتوار کی صبح جنگ بندی کے نفاذ کے بعد سے غزہ پٹی میں اسرائیلی حملوں میں آٹھ فلسطینی مارے گئے ہیں۔

بھارت ایکسپریس۔