Akanksha Dubey Suicide Case: بھوجپوری اداکارہ آکانشا دوبے کی مشتبہ موت کے معاملے میں ملزم سمر سنگھ گرفتار، یوپی پولیس نے جاری کیا تھا لُک آوٹ نوٹس

Akanksha Dubey: بھوجپوری اداکارہ آکانشا دوبے کی مشتبہ حالت میں موت کے معاملے میں یوپی پولیس نے ملزم گلوکار سمر سنگھ کو غازی آباد سے گرفتار کرلیا ہے۔ بتایا جار ہا ہے کہ پولیس اب گلوکار سمر سنگھ کو لے کر وارانسی جائے گی۔ سمر سنگھ، ان کے بھائی سنجے سنگھ کے خلاف آکانشا دوبے کی ماں مدھو دوبے نے سارناتھ تھانے میں معاملہ درج کرایا ہے۔

بھوجپوری فلموں کی اداکارہ آکانشا دوبے موت معاملے میں پولیس کو بڑی کامیابی ہاتھ لگی ہے۔ پولیس نے دارالحکومت دہلی سے متصل غازی آباد چارمس کرسٹل سوسائٹی راج نگر ایکسٹنشن سے سمر سنگھ کو گرفتار کرلیا ہے۔ واضح رہے کہ وارانسی پولیس نے ملزم گلوکار سمر سنگھ اوراس کے بھائی سنجے سنگھ کے خلاف لُک آوٹ نوٹس جاری کیا ہے۔

آکانشا دوبے کی ماں مدھو دوبے کے وکیل ششانک شیکھر ترپاٹھی نے اس پورے معاملے میں پولیس کے کردار کو مشتبہ ٹھہرایا تھا۔ بغیر وسرا رپورٹ آئے پوسٹ مارٹم رپورٹ ڈسکلوز کرنے کو انہوں نے غیرآئینی بتایا تھا۔ اس کے ساتھ ہی اس معاملے کی سی بی آئی جانچ کرانے کا مطالبہ کے پیش نظر وزیر اعلیٰ یوگی آدتیہ ناتھ کے نام خط لکھ کر اے ڈی ایم کو سونپا تھا۔

وہیں، اس معاملے میں ملزم گلوکار سمر سنگھ اور ان کے بھائی سنجے سنگھ نے اپنے بچاو میں الہ آباد ہائی کورٹ میں دفعہ 482 کے تحت عرضی دائر کی ہے۔ ذرائع کے مطابق، گلوکار نے اپنے خلاف درج ایف آئی آر کو منسوخ کرنے کی گہار لگاتے ہوئے عرضی دائر کی ہے۔

یہ بھی پڑھیں: Sana Khan-Mufti Anas Love Story: ثنا خان اور مفتی انس کی لو اسٹوری ہے دلچسپ، جان کر رہ جائیں گے حیران

واضح رہے کہ بھوجپوری فلم اداکارہ آکانشا دوبے گزشتہ 26 مارچ کو وارانسی کے ساتھ  سارناتھ واقع ایک ہوٹل کے کمرے میں مردہ پائی گئی تھی۔ ان کے گلے میں پھانسی کا پھندا لگا پایا گیا تھا۔ اس معاملے میں بھوجپوری گلوکار سمر سنگھ سمیت دو لوگوں کے خلاف مقدمہ درج کیا گیا ہے۔ آکانشا بھدوہی ضلع کے چوری تھانہ علاقہ کے پرسی پور کی رہنے والی تھیں۔

-بھارت ایکسپریس