Border 2 Advance Booking: بارڈر 2 کا طوفان، ریلیز سے پہلے ہی سنی دیول نے گاڑے جھنڈے، ایڈوانس بکنگ کے اعداد و شمار دیکھ اڑے بالی ووڈ کے ہوش

ممبئی: بالی ووڈ کی تاریخ میں چند فلمیں ایسی ہوتی ہیں جن کا نام آتے ہی شائقین کے رونگٹے کھڑے ہو جاتے ہیں اور 1997 میں ریلیز ہونے والی فلم ’’بارڈر‘‘ انہی میں سے ایک تھی۔ اب تقریباً تین دہائیوں بعد سنی دیول ایک بار پھر سرحد پر دشمن سے دو دو ہاتھ کرنے کے لیے واپس آ رہے ہیں اور فلم ’’بارڈر 2‘‘ نے ریلیز سے پہلے ہی باکس آفس پر طوفان برپا کر دیا ہے۔ فلم کی ریلیز میں ابھی چند دن باقی ہیں، مگر ایڈوانس بکنگ کے ابتدائی اعداد و شمار نے فلمی صنعت کو چونکا دیا ہے۔ پیر کے روز جیسے ہی فلم کی ایڈوانس بکنگ کا آغاز ہوا، ملک بھر میں سنیما گھروں اور آن لائن ٹکٹ بکنگ پلیٹ فارمز پر شائقین کا ہجوم امڈ آیا۔ ٹریڈ اینالسٹس کے مطابق محض پہلے 24 گھنٹوں میں فلم نے ایڈوانس ٹکٹ فروخت سے ڈھائی کروڑ روپے سے زائد کی کمائی کر لی ہے۔

رپورٹس کے مطابق اس وقت ملک بھر میں تقریباً 11 ہزار شوز کے لیے بکنگ جاری ہے، جن میں اب تک 73 ہزار سے زائد ٹکٹس فروخت ہو چکے ہیں۔ مشہور ٹکٹ بکنگ پلیٹ فارم بک مائی شو پر ہر گھنٹے دو ہزار سے زائد افراد فلم کے لیے اپنی نشستیں محفوظ کر رہے ہیں۔ اس رفتار نے یہ واضح کر دیا ہے کہ ریلیز کے پہلے ویک اینڈ پر سنیما گھروں میں تل دھرنے کی جگہ نہیں ملے گی۔ دلچسپ بات یہ ہے کہ سنی دیول نے اس بار اپنی ہی پچھلی فلموں کے ریکارڈ توڑ دیے ہیں۔ ان کی حالیہ فلم ’’جاٹ‘‘ کی مجموعی ایڈوانس بکنگ تقریباً 2.4 کروڑ روپے رہی تھی، جبکہ ’’بارڈر 2‘‘ نے یہ ہندسہ پہلے ہی دن عبور کر لیا ہے۔ اسی طرح 2023 کی بلاک بسٹر فلم ’’غدر 2‘‘ نے پہلے دن 2.2 کروڑ روپے کی ایڈوانس بکنگ کی تھی، مگر ’’بارڈر 2‘‘ نے اسے بھی پیچھے چھوڑ دیا ہے۔

اگر دیگر اداکاروں کی فلموں سے موازنہ کیا جائے تو رنویر سنگھ کی حالیہ فلم ’’دھُرندھر‘‘ نے پہلے دن محض ایک کروڑ روپے کی ایڈوانس بکنگ کی تھی، اگرچہ اس فلم نے بعد میں 28 کروڑ روپے کی اوپننگ لی۔ ’’غدر 2‘‘ نے پہلے دن 40 کروڑ روپے کمائے تھے، مگر جس انداز میں ’’بارڈر 2‘‘ کو شاندار ردعمل مل رہا ہے، اس سے قیاس آرائیاں کی جا رہی ہیں کہ یہ فلم پہلے ہی دن تمام سابقہ ریکارڈ توڑ سکتی ہے۔

ہدایت کار انوراگ سنگھ کی اس فلم کو 1997 کی کلٹ کلاسک ’’بارڈر‘‘ کا سیکوئل قرار دیا جا رہا ہے۔ اس بار سنی دیول کے ساتھ ورون دھون، دلجیت دوسانجھ اور آہان شیٹی جیسے نوجوان ستارے بھی اہم کرداروں میں نظر آئیں گے۔ فلم کو بھوشن کمار اور جے پی دتہ نے پروڈیوس کیا ہے، جو اس کی شاندار پیشکش اور بڑے پیمانے کی ضمانت سمجھے جا رہے ہیں۔ فلمی ماہرین کا ماننا ہے کہ ’’بارڈر 2‘‘ نہ صرف حب الوطنی کے جذبے کو پھر سے زندہ کرے گی بلکہ باکس آفس پر بھی ایک نیا سنگ میل قائم کر سکتی ہے۔ ریلیز سے قبل کے یہ اعداد و شمار واضح اشارہ دے رہے ہیں کہ سنی دیول ایک بار پھر بالی ووڈ کے بلا مقابلہ ایکشن ہیرو ثابت ہونے والے ہیں۔

بھارت ایکسپریس اردو۔